Чурапчыга биригэдьиир Боруонньа, биэлсэр Дуунньа тустарынан кинигэ сүрэхтэннэ
Оҕолор ийэлээх аҕаларын туһунан истиҥ ис хоһоонноох кинигэ таһааралларын киһи эрэ барыта кэрэхсээн ааҕар. Бу күннэргэ биир оннук кинигэ таҕыста. Кинигэни “Сүрэхпитигэр өрүү тыыннаахтар” диэн ааттаабыттар.
Кинигэҕэ Чурапчы улууһун Чыаппара бөһүөлэгэр бэйэлэрин кэмнэригэр олорон, үлэлээн ааспыт үлэ, тыыл бэтэрээнэ биэлсэр Евдокия Николаевна (1935- 2006 сс. ) уонна Чурапчы көһөрүллүүтүн кыттыылааҕа, үлэ, тыыл бэтэрээнэ биригэдьиир Прокопий Гурьевич (1930-2007 сс.) Оконешниковтар тустарынан чугастык уонна араас кэмҥэ алтыспыт дьонноро суруйбут ахтыылара киирбиттэр. Хас биирдии суруйууга ааспыт үйэ иккис аҥарыгар тыа сирин үлэһит ыалын олоҕо-дьаһаҕа, майгыта-сигилитэ, дьоҥҥо сыһыана арылхайдык арыллар.
— Сааһыран истэҕиҥ аайы киһиэхэ оҕо сааһа, төрөппүттэрэ, төрөөбүт сирэ-дойдута, чугас дьоно-сэргэтэ өссө ордук дьэҥкэрэн көстөр, санаан аастахха, сылааһынан угуттуур буолаллар эбит. Биһиги ахтар-саныыр дьоммут, ийэбит Евдокия Николаевна, аҕабыт Прокопий Гурьевич Оконешниковтар дьоһуннаах олоҕу олорон аастахтара. Нэһилиэкпит устуоруйатыгар үтүө суобастаах үлэлэринэн-хамнастарынан улахан кылааттарын киллэрдэхтэрэ. Бэйэлэрин кэмнэригэр биригэдьиир Боруонньа, биэлсэр Дуунньа диэн биллэр-көстөр дьон этилэр. Ким туох кыһалҕалааҕынан эбэтэр үөрүүлэрин тэҥҥэ үллэстээри күнүстэри-түүннэри кинилэргэ дьон тиһигин быспакка сылдьара. Мин өйдүүрбүнэн, син барыларын быһааран-отоорон ыыталлара. Кэм-кэрдии ааһар сокуонунан урукку умнуллар, саҥа сайдыылаах олох олохтонор. Ол эрээри ытык дьоммут, төрөппүттэрбит, биһиги сүрэхпитигэр өрүү тыыннаахтар.
Дьиҥэ, бу кинигэ матырыйаалын Семен Прокопьевич хомуйан саҕалаабыта ыраатта. Ол эрээри, син туохтан эрэ тардыллан, туга эрэ тиийбэт курдук буолан, көһөрүллэн испитэ.
Сыл-хонук хотоҕостуу субуллан ааһан иһэр, онон туох баарынан кинигэбитин күн сирин көрдөрөргө быһаарынныбыт. Хомойуох иһин, бастакынан ахтыы биэрбит истиҥник саныыр дьоммут сорохторо билигин биһиги кэккэбитигэр суохтар. Онон кинилэр суруйан хаалларбыт тыллара-өстөрө, санаалара өссө сыаналанан, күндүтүйэн биэрдилэр. Ситим быстыбатын курдук, оҕолоро, ыччаттара кинилэр олорбут олохторун салгыыллар.., — диэн кинигэ киириитигэр суруллар.
Онон кыргыттара — Мария Решетникова, Маргарита уонна уоллара Семен Оконешниковтар таһаарбыт кинигэлэрин ааҕыҥ, сэргээҥ.
Бэлэмнээтэ Женни Стрюкова
Хаартыска: кинигэ тас көстүүтэ (ааптардар тиксэрдилэр).