Чурапчыга биэссэр-акушер пууна уонна саҥа дьиэлэр аһылыннылар

Ааптар: 
21.12.2020
Бөлөххө киир:

Чурапчы улууһугар биэссэр-акушер пууна уонна элбэх кыбартыыралаах дьиэлэр аһылланнар, дьон-сэргэ улаханнык үөрдэ, сэргэхсийдэ.

Бахсыга биэссэр-акушер пууна тутуллан бүттэ диэн улуус дьаһалтатын пресс-киинэ иһитиннэрэр. «Бу бырайыакпыт өрөспүүбүлүкэ, улуус  салалталарын уонна СӨ Доруобуйа харыстабылын министиэристибэтин өйөбүллэринэн олоххо киирдэ, федеральнай бырагырааманан үбүлэннэ. Улууспут бары мэдиссиинэҕэ тэрилтэлэрин үлэһиттэрэ улахан өйөбүлү ыламмыт үөрүүбүт муҥура суох, махталбытын тиэрдэбит, — диэбит улуустааҕы киин балыыһа кылаабынай бырааһа Артем Ксенофонтов.
Бу иннинэ эргэ дьиэҕэ үлэлии турбут пуун, аныгы үйэ ирдэбилигэр эппиэттиир толору хааччыллыылаах тэрилтэҕэ кубулуйбут, наадалаах тэриллэммит, дьон-сэргэ сылдьарыгар табыгастаах усулуобуйаламмыт. Оттон Чурапчы бөһүөлэгэр икки уопсайга күлүүстэр хаһаайыттарга туттарыллыбыт буоллахтарына, Сылаҥҥа 22 кыбартыыралаах дьиэ үлэҕэ киирбит. Кырасыабай дьиэлэр болдьохторугар тутуллан бүппүттэр.

Чурапчы улууһун баһылыга Андрей Ноговицын дьиэлэри тутууга дойдулаахтара Алексей Пинигин салайааччылаах «Прогресс» уонна Иван Коротких дириэктэрдээх «Илин» ХЭУо үлэлээбиттэрин киэн туттан бэлиэтиир. Иван Коротких «СӨ Бочуоттаах тутааччыта», Алексей Пинигин «Чурапчы улууһун Бочуоттаах гражданина» буолбуттар.

Үөрүүлээх түгэҥҥэ СӨ Тутууга миниистирин солбуйааччы Евгений Афанасьев, тутууга өрөспүүбүлүкэтээҕи дириэксийэ бэрэстэбиитэлэ Владимир Скрыбыкин кыттыбыттар. Федеральнай бырагырааманы олоххо киллэрэргэ өйөбүллэрин иһин чурапчылар өрөспүүбүлүкэ салалтатыгар махтаналлар, саҥа дьиэлэммиттэргэ дьолу, үөрүүнү, доруобуйаны баҕараллар.

+1
0
+1
0
+1
0
+1
0
+1
0
+1
0
+1
0