Чурапчыга бибилэтиэкэ-архыып тутуллуо.
Бу туһунан улуус баһылыга Степан Саргыдаев улуус дьаһалтатын мунньаҕар иһитиннэрдэ. Тутуу боппуруоһугар улуус баһылыгын солбуйааччы Руслан Васильевка бибилэтиэкэ саҥа дьиэтин тутууну хонтуруолга ыларыгар этилиннэ. Бу күннэргэ дьиэ тутуллуохтаах сирин бэлэмнээн, эргэ поликлиниканы көтүрэллэр.
Улахан болҕомто улууска коронавируһу утары быһыыны туруорар хампаанньаҕа уурулунна. Быһыыны ылбыттар ахсааннара аҕыйаҕа, коронавирустаабыт дьоҥҥо бу ыарыы содуллааҕа бэлиэтэннэ. Улуус баһылыгын солбуйааччы Мария Кронниковаҕа ыам ыйынааҕы бырааһынньыктар өрөбүллэрин кэнниттэн, оройуон балыыһатын кэлэктиибин кытары мунньах ыытарыгар сорудах бэрилиннэ.
Маны таһынан ойуур баһаарыттан сэрэтиигэ болҕомтолорун туһаайдылар. Тэрилтэ салайааччыларыгар кэлэктииптэригэр өйдөтөр-сүбэлиир үлэлэри ыыталларыгар, тиэргэннэргэ уоттан сэрэхтээх буолалларыгар үлэни тэрийэллэригэр, булчуттары сэрэтэллэригэр этилиннэ.
Чурапчы сэлиэнньэтин баһылыгар Владимир Сивцевкэ ДНД тэрийэргэ уонна ИДьМ улуустааҕы салаатын кытары бииргэ сынньалаҥ күннэригэр уопсастыбаннай бэрээдэги хонтуруоллуурга үлэни күүһүрдэргэ сорудахтанна.
Маны сэргэ, Кыайыы күнүгэр улууска тэрээһиннэргэ күүстээх бэлэмнэнии ыытыллара этилиннэ. Чурапчылар Кыайыы күнүгэр анаммыт параадка көхтөөхтүк кыттарга бэлэмнэнэллэр.
Чурапчы улууһун дьаһалтатын пресс-киинэ