Чурапчы улууһун Чурапчы сэлиэнньэтигэр ураты үөрүүлээх күн буолла. Манна, улуус киинигэр турар толору хааччыллыылаах дьиэҕэ, “Дом образцового содержания” диэн федеральнай бэлиэ туттарылынна.
Түгэнинэн туһанан эттэххэ, маннык анал бэлиэлэр бу иннинэ дойду улахан куораттарыгар туттарыллыбыттарыгар, 80 дьиэ тиксибит. Олортон түөрдэ биһиги Сахабыт сиригэр. Ол курдук Нерюнгрига, Жатайга, Дьокуускайга. Онтон Чурапчы — тыа сирдэриттэн аан бастакынан маннык бэлиэни ылары ситистэ.
Толору хааччыллыылаах 24 кыбартыыралаах олорор дьиэ хаарбах дьиэттэн көһөрүү бырагыраама чэрчитинэн тутуллан үлэҕэ 2015 сыллаахха киллэриллибит. Дьиэ бастакы мэндиэмэнигэр 50 оҕо сылдьар “Туллукчаан” оҕо саада баар. Манна бастыҥ подъезд, бастыҥ ыстаарыста иһин күрэстэһиилэр ыытыллаллар. Олохтоохтор дьиэлэрин дьон-сэргэ көрөн хайҕаатын, сөбүлээтин, атыттарга холобур буоллун диэн подъезтарын, тиэргэннэрин тупсарарга кыһаллаллар. Онон бу үрдүк бэлиэ бастыҥ көрүүлээх-истиилээх дьиэҕэ саамай сөптөөхтүк туттарылынна диэн чурапчылар үөрэллэр, киэн тутталлар.
Умнуллубат бэлиэ түгэҥҥэ СӨ Ил Дархана Егор Борисов, РФ Коммунальнай хаһаайыстыбатын уларыта тутууга көмөнү оҥорор пуонда судаарыстыбаннай корпорациятын кэтээн көрөр сэбиэтин бэрэссэдээтэлэ Сергей Степашин, пуонда генеральнай дириэктэрэ Константин Цицин уо.д.а. ыалдьыттаатылар, истиҥ эҕэрдэлэрин тиэртилэр.
Сардаана БАСНАЕВА, “Саха сирэ”, edersaas.ru
Мария ВАСИЛЬЕВА хаартыскаларга түһэриитэ.