Чурапчы улууһугар балыыһа комплексын тутуохтара.
Саҥа балыыһа атаҕын түһэрии уонна компьютернай томография хоһун арыйыы үөрүүлээх түгэннэрэ буоллулар. Бу туһунан Чурапчы улууһун дьаһалтатын пресс-киинэ иһитиннэрдэ.
Улуус баһылыга Степан Саргыдаев: «Чурапчыга Өктөөп уулуссатыгар амбулатория бастакы атаҕа түһэрилиннэ. Бу суолталаах эбийиэк «РФ доруобуйа харыстабылын бастакы сүһүөх звенотун саҥатытыы» федеральнай бырагырааманан тутуллар. Оттон билигин улуус олохтоохторо ыраах айаннаабакка, бэйэлэрин сирдэригэр-уоттарыгар компьютернай томографияҕа көрдөрөн, доруобуйаларын бэрэбиэркэлэтэр кыахтаннылар«, — диир кини.
Күнүскү стационардаах уонна поликлиникалаах хас да мэндиэмэннээх балыыһа комплексын «Адгезия» ХЭУо 2023 сылга бүтэрэр былааннаах.
Билигин үлэлии турар балыыһа сыһыары тутуллар саҥа дьиэтэ улахан дьон поликлиниката буолуохтаах. Манна регистратура, процедурнай, быраастар көрөр хосторо, тиис эмтиир, терапевт отделениелара, күнүскү стационар, о.д.а. анал хостор былааннаналлар. Бэлиэтииллэринэн доруобуйаларыгар хааччахтаах дьон сылдьалларыгар табыгастаах гына оҥоһуллар.
Үөрүүлээх күҥҥэ СӨ Бырабыыталыстыбатын Бэрэссэдээтэлин бастакы солбуйааччы Кирилл Бычков, СӨ Тутууга миниистирэ Павел Кылатчанов, СӨ Доруобуйа харыстабылын миниистирин солбуйааччы Надежда Федорова, «СӨ судаарыстыбаннай сакаас сулууспата» ГКУ генеральнай дириэктэрин бастакы солбуйааччы Гаврил Скрыбыкин, улуус баһылыга Степан Саргыдаев, улуустааҕы киин балыыһа кылаабынай бырааһа Артем Ксенофонтов, улуус балыыһатын үлэһиттэрэ, уопсастыбаннас кытыннылар.