Хоту көһөрүллүү 80 сылынан Чурапчы улууһугар балаҕан ыйын 10 күнүттэн саҕалаан араас дьаһаллар ыытылла тураллар. Бу күнү кэриэстээн бэҕэһээ Эдьигээнтэн, Кэбээйиттэн дэлэгээссийэ кэллэ.
Бүгүн сарсыарда 10 чаастан көһөрүллүү мемориалыгар миитин буолла. Ол кэнниттэн дэлэгээссийэлэр Хатылы нэһилиэгэр айаннаан “Көһөрүллүү мусуойун” көрдүлэр-иһиттилэр.
Тэрээһиннэр чэрчилэринэн “Айылгы” оройуоннааҕы Норуот Айымньытын Дьиэтигэр Мунхалов галереятыгар биллэр фотограф Григорий Турантаев хаартыскатын итиэннэ көһөрүүгэ аналлаах кинигэ быыстапката тэрилиннэ. Петр Решетников аатынан норуодунай тыйаатыр Мария Герасимова-Сэҥээрэ суруйуутунан испэктээк көрдөрүөхтэрэ.
Аны киэһэ 20 чаастан Чурапчы нэһилиэгин көһөрүллүү мемориалыгар “Өйдөбүнньүк марша” диэн медиа-таетрализованнай дьүһүйүү уонна өйдөбүнньүк чүмэчи уурааһына буолара былааннанар.