Чурапчыга арассаадалары волонтердар дьиэҕэ илдьэн биэриэхтэрэ
Коровирус дьаҥыттан киллэриллибит хааччахтааһын дьон олоҕор-дьаһаҕар, дохуотугар охсубатын туһугар, Чурапчы улууһун дьаһалтата дьиэ кэргэн олоҕун уйгутун тупсарарга туһаайыллыбыт бырайыактары оҥорбутун туһунан биһиги эрдэ суруйан турабыт.
edersaas.ru.
«Дьиэҕэр олор — дьиэ кэргэн экономикатынан дьарыктан!» диэн бырайыак биир хайысхата сиртэн үүнээйини ылыы буолар. Бу хайысха чэрчитинэн, элбэх кыбартыыралаах уопсай дьиэлэргэ олорор эбэтэр кыараҕас, мөлтөх сирдээх дьон хортуоппуй олордоллоругар сир учаастага бэриллэр. Онуоха анаан Амма өрүс кытылыгар турар Болугур нэһилиэгин Мындаҕаайы сэл.«Сайдыы» бааһынай хаһаайыстыбата икки гектар сири тыырда. Бырагыраамма кыттыылаахтара (элбэх кыбартыыралаах уопсайдарга олорор, хортуоппуй олордорго сайаапка түһэрбит дьон) онтон учаастактары ыланнар, хортуоппуй олордоллор. Онуоха ирдэбил биир: бу ыаллар «Сайдыыттан» 50-нуу киилэ сиэмэ хортуоппуйу киилэтин 30 солк., эбэтэр барыта 1,5 тыһ. солк. атыылаһыахтаахтар. Сайаапкалары хомуйуу ыам ыйын 20 күнүгэр диэри ыытыллар.
Маны таһынан, С.А.Новгородов аатынан Чурапчы орто оскуолатын тэпилииссэтигэр икки өрүттээх дуогабарга олоҕуран, оҕуруот аһын олордуохха сөп. Бырагыраама хайысхатын үһүс салаатынан 3 х 4 миэтэрэ иэннээх тэпилииссэлэри Новосибирскайтан үлэһэн аҕалтарыы буолар. Билигин сайаапкалар түөлбэлэринэн хомулла сылдьаллар.
Бу ый ортотуттан агрооскуолалар, бааһынай уонна чааһынай хаһаайыстыбалар сайыҥҥы сибэкки уонна оҕуруот аһын арассаадаларын атыылааһыны тэрийиэхтэрэ. Харантыынынан сибээстээн, волонтердар эрдэттэн сайаапка хомуйан, ыам ыйын 22-30 күннэригэр арассаадалары дьиэҕэ илдьэн биэриэхтэрэ. Бу туһунан улуус дьаһалтатын пресс-киинэ иһитиннэрэр.
Раиса Сибирякова, «Саха сирэ» хаһыат, edersaas.ru