Быйыл Чурапчы улууһугар 32 хотон тутулунна, онтон 15 хотону бааһынай хаһаайыстыбалар үлэҕэ киллэрдилэр.
«Тыа хаһаайыстыбатын өйүүр бырагыраамаҕа саҥа сүүрээннэр, саҥардыылар киирэннэр, биһиги оройуоммутугар хотону тутуу маассабайдык ыытылынна. Саҥа тутуулар олохтоохтор үлэлэрин чэпчэтэргэ туһуланнылар. Хаһаайыстыба кэҥээбитинэн нникитин эбии үлэ миэстэтэ тахсыаҕа», — диэн улуус баһылыга Андрей Ноговицын бэлиэтиир.
Төлөй нэһилиэгэр быйыл сэттэ хотон тутуллубут. Борисовтар дьиэ кэргэн 500 тыһыынча солкуобайдаах грант ылан, 50 төбө сүөһүгэ анаммыт хотону үлэҕэ киллэрбиттэр. Кинилэр күҥҥэ 200 центнер үүтү ыыллар эбит. «Саҥа хотон туттаммыт төбө ахсаанын элбэр былааннаахпыт», — диэн Вера Борисова этэр.
Оттон Алексеевтар дьиэ кэргэн «Агростартап» бырагыраама куонкуруһугар бастааннар биэс мөлүйүөн солкуобайынан наҕараадаламмыттар. Бу үбүнэн дьиэ кэргэн 50 төбөҕө анаан улахан хотон туттубуттар, эбии ынах атыыласпыттар, итиэннэ тиэхиньикэлэммиттэр. «Эрдэ 12 ынаҕы ыыр этибит, онон эбии 17 ыанар ынаҕы атыыластыбыт. Хаһаайыстыбабытыгар бэйэбитин таһынан тырахтарыыстаахпыт уонна ыанньыксыттаахпыт», — диэн аҕа баһылык Руслан Алексеев кэпсиир.
Чурапчы улууһун олохтоохторо тыа хаһаайыстыбатын сайдыытын өйүүллэригэр өрөспүүбүлүкэ, оройуон салалтатыгар, оройуоннааҕы тыа хаһаайыстыбатын управлениетыгар махтаналлар.
edersaas.ru
Хаартыска — СИА.