Чурапчы уопсастыбанньыктара бэлисипиэтинэн Бороҕоҥҥо айаннаатылар (ВИДЕО)

Ааптар: 
Бөлөххө киир:

Бэҕэһээ, от ыйын 4 күнүгэр, сарсыарда Саха сирин норуоттарын VIII спортивнай оонньууларыгар Чурапчы улууһуттан бэлисипиэтинэн дьарыктанар дьон  түмсүүлэрэ Сылаҥ — Улахан Күөл — Балаҕаннаах — Курбуһах — Бороҕон туһаайыытынан айаҥҥа туруннулар.

Бу туһунан Курбуһах нэһилиэгин Балаҕаннаах учаастагын  олохтооҕо Галина Бурнашева кэпсиир:
— Тэрээһин 13 кыттыылаахтарыттан үгүстэрэ 2018 с. Амма улууһугар буолбут Саха сирин норуоттарын спортивнай оонньууларыгар эмиэ  бэлисипиэтинэн айаннаабыт үөрүйэхтээх дьон.
Уһун уустук айаҥҥа  кэрэ аҥардар бааллара киһини үөрдэр уонна кэрэхсэтэр. Кинилэр өҥүрүк куйааска  айаннаан холонон көрөргө уонна Уус Алдан улууһугар ыытыллар спортивнай оонньууларга бэйэлэрин суолларын-иистэрин хаалларарга биир үтүө түгэн тосхойбутугар кыттарга санаммыттар. Чурапчылар чөл олоҕу дьоҥҥо-сэргэҕэ пропагандалыыр сыаллаах туруммуттара үтүө холобур уонна биһирэниэн эрэ сөп.  


Биир дойдулаахтарын Чурапчы нэһилиэгин дьаһалтатын баһылыга Владимир Сивцев уонна баһылыгы социальнай боппуруостарга солбуйааччы Николай Аммосов алгыс тыл этэн атаарбыттар. Нэһилиэк дьаһалтата тэрээһин боппуруостары: Чурапчы уонна Уус Алдан улуустарын устун айаны барытын быһааран, дьонноро этэҥҥэ айаннаан иһэллэр. 

Ити курдук, Бороҕоҥҥо буолар турар спартакиадаҕа анаан уопсастыбанньыктар баҕа өттүлэринэн араас тэрээһиннэри көхтөөхтүк тэрийэллэрэ өрөспүүбүлүкэ бары нэһилиэктэригэр бастыҥ холобур.

Елена ПОТОЦКАЯ, «Саха сирэ» хаһыат.

Хаартыска уонна видео Курбуһах нэһилиэгин дьаһалтатын тиксэриитэ.

+1
0
+1
0
+1
0
+1
0
+1
0
+1
0
+1
0