Маны аах Уопсастыба

Чурапчы уола Алгыстаан — Кыайыы параадын кыттыылааҕа

С.А. Новгородов аатынан Чурапчы орто оскуолатын 2020 сыллааҕы выпускнига
Алгыстаан Скрябин бүгүн, ыам ыйын 9 күнүгэр, дойду тэбэр сүрэҕэр Москваҕа ыытыллар Улуу Кыайыы параадыгар кыттыыны ылыаҕа.
Бу туһунан СИА таҕыста. Алгыстаан аҕата Арыылаах орто оскуолатын дириэктэрэ Владислав Скрябин уолун туһунан киэн тутта кэпсээтэ: «Ефрейтор, артиллерийскай САУ спецмэхээнньигэ-суоппара Алгыстаан Скрябин сулууспатын II Таманскай гвардейскай мотострелковай дивизиятыгар бара сылдьар. Ийэтэ Елена Скрябина — урбаанньыт. Алгыстаан Чыаппара нэһилиэгин ытык сис ыала Филипп Васильевич уонна Христина Григорьевна Протодьяконовтар улахан сиэннэрэ.
Оҕо сааһыгар көҥүл тустуунан дьарыктаммыта. «Беркут» байыаннай-патриотическай кулууп иитиллээччитэ. Бу манна дьарыктаныыта киниэхэ сулууспалыырыгар көмөлөспүтэ чахчы. Алгыстаан — улахан оҕобут. Син эмиэ тыа оҕолорун кэриэтэ дьиэ ис-тас үлэтигэр үөрүйэх, хаһаайыстыбаннай буола улааппыта. Бары научнай олимпиадаларга кыттан, өрүү бириистээх миэстэлэргэ тиксэрэ. Чурапчытааҕы ИДьО иһинэн үлэлиир ДНД чилиэнэ. Түгэнинэн туһанан, оҕобутун олоххо көхтөөх гына ииппит оскуола дириэктэригэр Надежда Уароваҕа, «Беркут» кулууп салайааччыта Дмитрий Соловьевка истиҥ махталбытын тиэрдэбит». Бүгүҥҥү Улуу Кыайыыга анаммыт параады Чурапчы улууһун олохтоохторо уолларын көрөөрү, бары кэтэһэллэр.

Елена ПОТОЦКАЯ, Саха сирэ хаһыат, edersaas.ru

0
0