Чурапчы улууһун Мэлдьэхситигэр тахсыбыт ойуур баһаарыгар 70 киһи үлэлиир

Чурапчы улууһун Хоптоҕо нэһилиэгин Мэлдьэхси учаастагар билигин 15 тыһыынча гектар иэннээх сиргэ ойуур баһаара барбыта билиннэ. Бэҕэһээ уот нэһилиэнньэлээх пууҥҥа чугаһаан кутталы үөскэттэ.

Баһаары түөрт сиринэн умуруора сылдьаллар. Чурапчы улууһуттан Хайахсыт, Мугудай нэһилиэктэрин, Улахан Эбэ сэлиэнньэтин (Мэлдьэхси учаастага) уонна Мэҥэ Хаҥалас Баатара нэһилиэгин өттүттэн. Баһаарга уопсайа 344 киһи, 17 тиэхиньикэ үлэлии сылдьар.

Улахан Эбэни уоттан харыстааһыҥҥа бэҕэһээ олохтоохтортон Дириҥ, Чурапчы сэлиэнньэлэриттэн хомуллан 70 киһи үлэлээтэ. Икки баһаарынай массыына, түөрт уу кутар массыына уонна тыраахтардар нэһилиэнньэлээх пууну харыстааһыҥҥа турдулар.

Санатан суруйдахха, атырдьах ыйын 10 күнүгэр манна үөһэнэн ойуур баһаара барбыта. Мэлдьэхси учаастага нэһилиэк кииниттэн икки көстөөх сиргэ баар. Суотабай сибээс суох. Кыһынын манна отучча киһи олорор. Сайынын отчуттар, сайылыы кэлээччилэр эбиллэн, сүүс киһи буолаллар. Атырдьах ыйын 10 күнүгэр олохтоохтору нэһилиэк киинигэр Дириҥҥэ көһөрбүттэрэ.

Аграфена КУЗЬМИНА.