Чурапчы улууһун баһылыга Андрей Ноговицыны силиэстийэ уорганнара хоруупсуйаҕа уорбалаан туттулар.
Чурапчы улууһун борокуратуурата «Чурапчытааҕы үөрэтэр-оҥорон таһаарар кэмбинээт» муниципальнай автономнай эбии үөрэх тэрилтэтигэр бүддьүөт харчытын туттуу хайдаҕын бэрэбиэркэлээбит.
Ол түмүгэр, бу үп-харчы улуус баһылыгын тус наадатыгар туттуллубута биллибит.
Бу чахчынан РФ Холуобунай кодексатын 285-с ыст. 2-с чааһынан, ол эбэтэр, дуоһунастаах киһи ымсыы санааттан сулууспатын интэриэһин утары сулууспатын боломуочуйатынан туһаныы бэлиэтэ баарынан, холуобунай дьыала тэриллибит.
Силиэстийэ сабаҕалыырынан, Чурапчы улууһун баһылыга ити кэмбинээт дириэктэригэр сокуоннайа суох дьаһал биэрбит: бүддьүөт харчытынан бэйэтин наадатыгар туттар тутуу матырыйаалларын төлүүрүгэр диэн. 2018 сыл олунньу ыйыгар харчыны поставщикка ыыппыттар.
Төһө сууммалаах хоромньу тахсыбыта силиэстийэ кэмигэр биллиэҕэ.
Улуус баһылыгын дьону быстах кэмҥэ тутар изоляторга хаайбыттар. Силиэстийэ саҕаланна.
Бу туһунан РФ Силиэстийэлиир кэмитиэтин Саха сиринээҕи управлениета уонна СӨ Борокуратууратын пресс-сулууспата иhитиннэрдилэр.
Биһиги корр., «Саха сирэ» хаһыат, edersaas.ru
Хаартыска: ЯСИА.