Чурапчы улууһун норуодунай дьокутааттарын сэбиэттэрин иһинэн үлэлиир Ыччат палаатата тэрилиннэ. Бу быһаарыныыны Сэбиэт 36-с сессиятын кэмигэр ыллылар. Бырайыагы улуус көхтөөх ыччата, улуус дьаһалтатын персоналы салайыыга уонна тэрээһиннээх үлэҕэ сулууспатын салайааччы Айтал Керемясов көмүскээтэ.
Улуус баһылыга Андрей Ноговицын бэлиэтииринэн, ыччаты кытта үлэлиир координационнай сэбиэт улууска ыччат бэлиитикэтэ олоххо киириитигэр улахан үлэни ыытар. Онон бу икки структура — палаата уонна сэбиэт биир тэтимнээх уонна систиэмэлээх үлэтэ ыччат гранын ылыыга, көхтөөх ыччаты өйөөһүҥҥэ үгүс кыаҕы биэриэхтэрэ.
Улуус Ыччатын палаататын бырайыагын үлэтигэр дьаһалта ыччакка отделын исписэлииһэ Анастасия Спиридонова уонна Чурапчы гимназиятын үөрэнээччитэ, Арассыыйатааҕы «Моя законотворческая инициатива» куонкурус кыайыылааҕа Ньургун Пермяков кыттыыны ыллылар. Сонуну улуус дьаһалтатын пресс-сулууспата иһитиннэрэр.