Чурапчы улууһугар Кыайыы күнүгэр аналлаах тэрээһиннэр саҕаланнылар

Ааптар: 
Бөлөххө киир:

Бүгүн Кыайыы күнүн көрсө Чурапчы сэлиэнньэтигэр үөрүүлээх быһыыга-майгыга улуус дьаһалтатын дьиэтин үрдүгэр Кыайыы Знамятын туруордулар.

Аҕа дойду Улуу сэриитин кыттыылааҕа, «Хотугу сулус» уордьан кавалерын И. М. Павлов аатынан орто оскуола үлэһиттэрэр Кыайыы маршын доҕуһуолугар хааман улуус дьаһалтатын дьиэтин иннинээҕи болуоссакка Кыайыы кыһыл Знамятын аҕаллылар.

«Хорсун хоодуот буойуннарбыт Кыһыл Знамяны өрө тутан сэриигэ барбыттара, кыһыл Знамяны өрө көтөҕөн күүтүүлээх Кыайыы күнүн көрсүбүттэрэ. Саллааттар кэриэстэрин чиэстээн бүгүн Фашистскай Германия үрдүнэн күөрэйбит Кыайыы Кыһыл Знамятын  улуус дьаһалтатын дьиэтин үрдүгэр үөрүүлээх быһыыга-майгыга туруордубут. Пандемия буолан Улуу Кыайыы 76 сылын онлайн эрэсиимҥэ параада, дьон-сэргэ маассабай кыттыыта суох көрсөбүт. Ол да буоллар бу икки күн иһигэр бэтэрээннэрбитин барыларын хайааан даҕаны чиэстиибит. Улуус дьаһалтатын сакааһынан сэрии кыттыылаахтара  Гаврил Протодьяконовка, Иван Павловка уонна хотугу улуустарга көһөрүллүбүт биир дойдулаахтарбытыгар анаан үс документальнай киинэ уһуллунна. Биир дойдулаахтарбыт Аҕа дойду улуу сэриитин сылларыгар оҥорбут хорсун быһыыларын үйэтитиигэ бэйэбит кылааппыт буолар. Ону таһынан улуус бары нэһилиэктэригэр сэрии кыттыылаахтарын уонна тыыл бэтэрээннэрин үйэтитиигэ көхтөөх үлэ бара турар. Быйыл балаҕан ыйыгар Кыайыы пааматынньыгын аттыгар Мэҥэ уоту арыйарга сананныбыт. Мэҥэ уокка гаас ситимин тардыыга урбаанньыт Иннокентий Архипов ылсыаҕа», — диэн улуус баһылыга Андрей Ноговицын бэлиэтээтэ.

Улуус бары дьокутааттарын аатыттан Чурапчы улууһун норуодунай дьокутааттарын Сэбиэтин бэрэссэдээтэлэ Афанасий Захаров бүгүҥҥү бэлиэ түгэнинэн эҕэрдэлээтэ уонна улуус олохтоохторун, ыччаты  ыытыллар аахсыйаларга көхтөөхтүк кытталларыгар ыҥырда. Хааччахтааһын миэрэлэрин барытын тутуһан, бэтэрээннэри барыларын эҕэрдэлээбиттэрин иһитиннэрдэ. Итиэннэ  «Кыайыы түннүктэрэ», «Өйдөбүннньүк чүмэчитэ, «Өлбөт үйэлээх полк» онтон да атын аахсыйалар онлайн эрэсииминэн ыытыллалларын эттэ.

Бу күн Чурапчы нэһилиэгин дьаһалтатын баһылыга Владимир Сивцев, улуус ыччатын лиидэрэ Анастасия Спиридонова уонна да атыттар истиҥник эҕэрдэлээтилэр.

Бүгүҥҥүттэн улуус хас биирдии нэһилиэгэр бырааһынньыктааҕы тэрээһиннэр уонна аахсыйалар саҕаланнылар. Сарсын «Кыайыы түннүктэрэ», «Өйдөбүннньүк чүмэчитэ», «Өлбөт үйэлээх полк» онлайн-тэрээһиннэр ыытыллыахтара диэр Чурапчы улууһун дьаһалтатын пресс-сулууспата иһитиннэрэр.

+1
0
+1
0
+1
0
+1
0
+1
0
+1
0
+1
0