Чурапчы улууһун баһылыгын э.т. Алексей Ноговицын уонна улуус депутаттарын сэбиэтин бэрэссэдээтэлэ Афанасий Захаров бу күннэргэ Приморьеҕа сылдьан, бөҕү наардааһыны тэрийиигэ эрэгийиэннээҕи операторы кытары көрсөн кэпсэттилэр.
Приморскай кыраайга 2019 сыллаахха бөҕү наардааһыҥҥа анал оператор тэриллэн, эрэгийиэн бу хайысхаҕа күүскэ ылсан үлэлээн эрэр. Чурапчы улууһун дэлэгээссийэтэ бөҕү наардааһыҥҥа анаммыт эрэгийиэннээҕи тэрилтэ дириэктэрин солбуйааччыларын Антон Бибиковы, Ирина Чебованы кытары көрсөн, коммунальнай хаһаайыстыба өттүгэр элбэх кыбартыыралаах дьиэлэри көрөр тэрилтэлэр үлэлэрин билистилэр, бөҕү наардыыр пууннар хайдах тэриллэллэрин көрдүлэр. Ону сэргэ эрэгийиэннээҕи анал бырагыраама нөҥүө предпринимателлэри бөҕү таһыыга көҕүлээһин, нэһилиэнньэни кытары үлэ туһунан кэпсэттилэр.
Алексей Ноговицын бэлиэтииринэн, эрэгийиэннээҕи оператор нэһилиэнньэни кытары ыкса үлэлэһэр. Ол курдук, волонтердары кытары бөҕү наардаан хомуйууга ылсыбыт. Ону таһынан бөҕү-саҕы иккистээн туһаҕа таһаарыыга үчүгэй уопуттаах. Билигин киин тэрилтэ пластик оҥоруутунан дьарыктанар.
Аграфена КУЗЬМИНА