Бу күннэргэ “Ростелеком” хампаанньа Чурапчы улууһугар бүтэһик нэһилиэккэ оптоволоконнай сибээһи (ВОЛС) тиксэрдэ. Мырылаҕа тардыллыбыт ВОЛС ситиминэн улуус нэһилиэктэригэр түргэн интэриниэтинэн хааччыйыы түмүктэннэ. Бу күнтэн ыла Чурапчы улууһун 16 нэһилиэгэр хааччаҕа суох интэриниэти, Wink видеосервиһи, видеонан кэтээн көрүүнү уонна да атын сыыпара нөҥүө оҥоһуллар өҥөлөрү туһаныахха сөп буолла.
Бу үлэ “Сахателеком” филиал Чурапчыга Аллараа Бэстээхтэн ВОЛС лиинийэтэ 2014 сыллаахха тардыллыаҕыттан ыла саҕаламмыта. Сэттэ сыл иһигэр 550 км оптоволокно ситимэ тардыллыбыта (нэһилиэктэр истэригэр тардыллыбыт ситими аахпакка эрэ), 20 тыһыынчаттан тахса туһанааччы түргэн интэриниэти холбонор кыахтаммыта.
— Чурапчы улууһун ВОЛС-ка холбуур федеральнай бырагырааманан “Ростелеком” көмөтүнэн ыытылынна. Интэриниэтинэн 100% хааччыйыы сайдыыга, цифровой экэниэмикэҕэ көһөргө улахан күүс буолуоҕа, үөрэҕирии, доруобуйаны харыстааһын эйгэлэригэр көмөлөһүөҕэ. Бары бииргэ түмсэн үлэлээн, Ил Дархан Айсен Николаев дьон олорор сириттэн тутулуга суох сайдарга тэҥ кыаҕы биэрэргэ туһааннаах сорудаҕын кэмигэр толордубут, — диэн улуус баһылыга Андрей Ноговицын этэр.
— Бары нэһилиэктэрэ интэриниэтинэн хааччыллыбыт улуустартан Чурапчы үһүс буолла. Бу сыллааҕы былааҥҥа Өймөкөөн улууһа турар. ВОЛС тиийбит улуустарыгар суотабай оператордар түөрт көлүөнэ мобильнай интэриниэти холбуохтара, дьон муниципальнай уонна судаарыстыбыннай өҥөлөргө холбонор кыахтанар. Түргэн интэриниэт үлэ миэстэтэ тахсарыгар кыах биэрэр, уопсайынан дьон олоҕун таһымын үрдэтэр, — диэн СӨ Цифровой сайдыыга уонна инновацияҕа миниистирэ Анатолий Семенов иһитиннэрдэ.
Билигин улууска социальнай суолталаах эбийиэктэри түргэн интэриниэккэ холбуур үлэ саҕаланыахтаах. 2021 сылга 18 социальнай тэрилтэ холбонуоҕа, ол иһигэр 8 үөрэх тэрилтэтэ, 2 олохтоох дьаһалта, 1 баһаарынай чаас.
«Саха сирэ» хаһыат, edersaas.ru
Хаартыска — www.sakha.gov.ru