Чурапчы Төлөйүгэр «Аныгы көлүөнэ бибилэтиэкэтэ» аһылынна

Ааптар: 
Бөлөххө киир:

Чурапчы улууһун Төлөй нэһилиэгэр  «Култуура» национальнай бырайыак чэрчитинэн «Аныгы көлүөнэ бибилэтиэкэтэ» бырайыак олоххо киирдэ.

Бу тыа сиригэр чугаһынан суох бырайыак 5 мөлүйүөннээх федеральнай грант өйөбүлүнэн  ситиһилиннэ.

— Төлөй бибилэтиэкэтэ кинигэтин пуондата — 8160 экземпляр. Сыл аайы 715 экземпляр саҥа  кинигэ кэлэр. 20 араас хаһыаты суруттарабыт. 

Бибилэтиэкэбит «Аартык» норуот айымньытын киинигэр баар. Саҥардыллан өрөмүөннэммитин кэннэ иэнэ 69,5 кв. м -тэн 179,1 кв.м  диэри улаатта. Муостабытын, дьиэтин үрдүн, уотун-күөһүн уларыттыбыт. Саҥа миэбэли ыллыбыт. Бибилэтиэкэ саҥа аныгы оргтиэхиньикэнэн хааччылынна. 

Нэһилиэк устуоруйатын кэпсиир «Кэм кэрдииһинньигэ» галерея баар буолла.  Биир дойдулаахпыт, маҥнайгы Ил Дархан Егор Борисовка аналлаах «Төлөй» дьоҕус мусуой, Дьүрүһүй» көмпүүтэрдээх ааҕар саала, киинэ көрдөрөр уонна кэмпириэнсийэ ыытар саалалар, «Дабаан» коворкинг-эйгэтигэр араас куруһуоктары ыытар хостор, «Сандалы» библио-кафе, эти-хааны чэбдигирдэргэ уонна ааҕыыны тэрийэргэ аналлаах «Чэбдик» фитнесс-хос, «Харысхал» кыра уонна орто саастаах оҕолорго аналлаах хостор баар буоллулар.   

 

Бибилэтиэкэбит култуура управлениетын нөҥүө  саайтанна, онно ыытыллыбыт тэрээһиннэрбитин тута таһаара, сырдата олоробут. Бибилэтиэкэбит саҥардыллан өссө тахсыылаахтык үлэлиир соруктаахпыт, — диэн бибилэтикэкэ сэбиэдиссэйэ Изабелла Кузьмина сонунун кэпсээтэ.

Бу маннык аныгылыы хайысхалаах бибилэтиэкэҕэ олоохтоохтор тоҕуоруһа мустан, иллэҥ кэмнэрин атаарыахтара.

Елена ПОТОЦКАЯ, “Саха сирэ” хаһыат, edersaas.ru

Хаартыска: Изабелла Кузьмина тиксэриитэ.

+1
0
+1
0
+1
0
+1
0
+1
0
+1
0
+1
0