Сүрүн Уопсастыба

Чурапчы Сылаҥар кус иитэллэр

Чурапчы улууһугар Георгий Башарин аатынан Сылаҥ  агрооскуолатын алын сүһүөх кылааһын учуутала Ньургуйаана Сивцева көтөрү иитиинэн дьарыктаммыта төрдүс сылыгар барда. 

Тыа сирин учууталын бу дьарыга сыалай научнай үлэҕэ тэҥнээх. Хайдах тыа сирин олохтооҕор итинник ымпыгар-чымпыгар диэри үөрэтэн, көтөр иитэр кыалларый?

—  Сакаастаан ылбыт сымыыттарбытыттан төһө бырыһыан тахсыбытын ырытабыт, отчуоттуубут. Бу маны барытын сымыыты тиэрдэр хаһаайыстыбаларбыт ирдииллэр. Кинилэр эмиэ интэриэстээхтэр. Үлэлэрин түмүгэ буоллаҕа. Кураанах сымыыты ыллахтарына, ол хаһаайыстыбаны кытта үлэлээбэт буоллахпыт дии. Ханнык эрэ боруода мөлтөһүөр буоллаҕына, атыҥҥа көһөллөр. Онон суот-учуот ирдэбилэ кытаанах.

Бары бөлөхтөрбүтүттэн көрө-үөрэтэ олоробут — хантан сымыыты ыларбытын. Биллэн турар, сыаната чэпчэкитин талаҕын. Холобур, “Оксана сыаната ыарахан, Наталья киэнэ чэпчэки соҕус, Елена боруодата өссө үчүгэй хаачыстыбалаах” диэн талаҕын. Кус  кууруссатаҕар быдан барыстаах — икки ыйынан номнуо эт буолан тахсар. Холобур, икки аҥар ыйыгар 4,5 киилэ буолар. Ол эрээри бастакы күннэриттэн тустаах ирдэбили тутуһуохха наада. Холобур, кыра оҕоҕо аналлаах битэмииннээх эбии аһылыктар бааллар дии, көтөргө эмиэ оннук аһылыктары биэрэҕин. Кыра эрдэхтэринэ, сымыыттан тахсаат, түүлэрэ кылабачыгас, кылархай буолар. Онтон улаатан истэхтэрин аайы, түүлэрэ уларыйан иһэр.

Уйаларын күҥҥэ иккитэ ыраастыыбын. Манна чугас уулаахпыт. Сайын онно усталлар. Өрүү кураанах от тэлгиибит. Көрүү-истии үлэттэн тахсар. Кус кууруссатааҕар кирдээх көтөр. Сүрүннээн уулаах сиргэ олорор көтөр.

Сылаҥ агрооскуолатын учуутала Ньургуйаана Сивцева үөрэтэр оҕолорун көтөрү иитэргэ хайдах уһуйбутун, кустарын хантан хайдах үлэһэн ыларын, төрөөбүт Сылаҥар куһу хайдах иитэрин «Саха сирэ» хаһыат чэппиэрдээҕи нүөмэригэр ааҕыҥ.

 

Елена ПОТОЦКАЯ, «Саха сирэ» хаһыат. 

0
0
Telegram Whatsapp