Чурапчы «Спортивнай» түөлбэтигэр норуот көҕүлээһининэн уу ситимэ үлэлээтэ

Бу өрөбүллэргэ Чурапчы нэһилиэгэр «Спортивнай» түөлбэҕэ сайыҥҥы уу ситимэ үлэҕэ киирдэ. 

Чурапчы сэлиэнньэтин баһылыга Владимир Сивцев иһитиннэрбитинэн, 130 ыалга уу ситимэ тиийдэ. Тэрийээччилэр  Бакдакумовтар тиэргэннэригэр Норуот көҕүлээһинин бырагырааматын чэрчитинэн сайыҥҥы уу ситимин киллэрэр үөрүүлээх тэрээһин сиэрин-туомун оҥордулар.

Сайыҥҥы уу ситимигэр өрөспүүбүлүкэ бүддьүөттүттэн  1,5 мөлүйүөн солкуобай субсидия көрүллүбүт. Маны таһынан, норуот көҕүлээһинин быраагыраматын  куонкуруһун  ирдэбилинэн олохтоох бүддьүөттэн эбии үп көрүллэр.

Үп министиэристибэтин пресс-сэкирээтэрэ Анна Чусовская иһитиннэрбитинэн, норуот көҕүлээһинин быраагырааматын чэрчитинэн  кылгас кэм иһигэр Чурапчы нэһилиэгин сайдыытыгар туһуламмыт үгүс үлэ барда. Ол курдук,  2018 сыллаахха Поликарп Барахсанов аатынан сынньалаҥ пааркатыгар оҕо этин-хаанын чэбдигирдэр «Ниндзя-квест» аттракцион арыллыбыта, ону таһынан Мурун Тымпыйа түөлбэҕэ сайыҥҥы уу ситимэ уонна уулуссатааҕы уот холбоммута. 2019 сылга Куоҕалы, Маарыкчаан, Спортивнай түөлбэлэргэ  35 остуолба туран, уулусса уота холбоммута.
2020 сыллаахха киин уулуссаларга 450 м тратуар тэлгэммитэ, Чараҥ түөлбэҕэ  45 остуолбаны туруоран,  уулусса уотун холбообуттара. Чурапчытааҕы киин баанньык саҥардыллан, олохтоохтору үөрдүбүтэ.

Ити курдук, чурапчылар Норуот көҕүлээһинин бырагырааматыгар актыыбынайдык кытталлар.

Елена ПОТОЦКАЯ, «Саха сирэ» хаһыат.