Чурапчы сэлиэнньэтигэр Куоҕалы түөлбэтигэр күөх төлөн кэллэ
Бүгүн, ахсынньы 5 күнүгэр, Саха сирин баһылыга Айсен Николаев Чурапчы улууһугар оробуочай сырыытын кэмигэр Чурапчы сэлиэнньэтигэр Куоҕалы түөлбэтигэр күөх төлөнү ыытыыга кытынна.
Сэлиэнньэ бу өттүгэр 2,5 тыһыынча киһи олорор. Манна “Туллукчаан”, “Березка” дьыссааттар, Чурапчытааҕы гимназия, кэллиэс, ойуур хаһаайыстыбата, “Чурапчы” тыа хаһаайыстыбатын кэпэрэтиибэ бааллар. Дьону хаарбах уонна саахалланар туруктаах дьиэлэртэн көһөрүү бырагырааматынан бу түөлбэҕэ элбэх кыбартыыралаах түөрт таас дьиэ тутуллан, 200-кэ ыал олорор.
Саха сирин баһылыга Айсен Николаев Чурапчы олохтоохторун бэлиэ түгэн тосхойбутунан эҕэрдэлээтэ: “Гаас киирбитинэн эһиги дьиэлэргитигэр өрүү сылаас уонна киһи кута-сүрэ тохтуур буоллун. Кэнники сылларга Илин эҥэр улуустары гаастааһын бырагыраамата олоххо киирэр, ону Егор Афанасьевич Борисов саҕалаабыта. Билигин гаас Чурапчыга тиийдэ. Былааннаммыт 12 учаастактан бэһис учаастак үлэҕэ киирдэ. Эһиги, чурапчылар, инники диэки эрэллээхтик хардыылыыгыт, мин эһиэхэ тэтимнээх сайдыыны баҕарабын”, — диэтэ Ил Дархан.
Бу үөрүүлээх түгэҥҥэ кыттар РФ Федеральнай Мунньаҕын Федерация Сэбиэтин Кэмитиэтин бэрэссэдээтэлин солбуйааччы Егор Борисов кини төрөөбүт түөлбэтигэр гаас киирбитин бэлиэтээтэ. “Бүгүн өрөспүүбүлүкэҕэ маннык үөрүүлээх бэлиэ түгэннэр үгүстүк буолаллар. Оскуолалар, оҕо саадтара, балыыһалар, суоллар үлэҕэ киирэллэр, аҕыйах хонуктааҕыта Марханы туоратар муоста аһыллыбыта. Бу барыта өрөспүүбүлүкэбит салалтатын ыытар бэлиитикэтин сүрүн ис хоһооно”, — диэн Егор Борисов тоһоҕолоон эттэ .
Гаас кэлиитин сиэрин-туомун кэнниттэн Саха сирин Ил Дархана Айсен Николаев бу түөлбэҕэ олорор элбэх оҕолоох Филипповтарга таарыйда.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Женни Стрюкова бэлэмнээтэ