«Тыа сирин кэлим сайыннарыы» бырагыраама чэрчитинэн, Чурапчы сэлиэнньэтигэр чааһынай сиэктэргэ гаас утаҕын тардыы саҕаланна.
edersaas.ru
Барыта 117 мөл. солк. суумалаах 25847 миэтэрэ усталаах гаас утаҕа тардыллыахтаах. Быйыл 95,8 мөл. солк., ол иһигэр федерацияттан 88,1 мөл., өрөспүүбүлүкэ бүддьүөтүттэн 7,7 мөл. солк. көрүллүбүт. «Тыа хаһаайыстыбатын министиэристибэтин тутууга дириэксийэтэ» ГКТ дириэктэрэ Кирилл Местников этэринэн, «Строй В» бэдэрээтчит халлаан сылыйан, үлэлээн ырааппыт.
Билигин Ярославскай уонна Петровскай уулуссаларынан гаас утаҕа барар сирин хаара ыраастанан, сыбааркалыыр үлэ ыытыллар. 108х4,0 мм кээмэйдээх 2,5 км усталаах тимир турба аҕалыллыбыт. Үлэ дуогабар быһыытынан 2021 сыл балаҕан ыйын 1 күнүгэр бүтэриллиэхтээх, 421 ыал дьиэтэ холбонуохтаах. Бу үлэ «Тыа сирин гаастааһыны сайыннарыы» бырагырааманы кытары алтыһан, кэлэр сылга бөһүөлэк иһинээҕи гаас утаҕа Дириҥҥэ уонна Үрүҥ Күөлгэ тардыллара былааннанар.
Маны таһынан, быйыл тыа сирин тупсаран оҥоруу бырагырааматынан, аҕыс нэһилиэккэ (Хоптоҕоҕо, Соловьевка, Арыылаахха, Чакырга, Бахсыга, Кытаанахха, Хадаарга, Сылаҥҥа) уопсастыбаннай суолталаах бырайыактарынан Ыһыахтыыр сир тупсарыллыа, Аҕа дойду Улуу сэриитигэр охтубут буойуттарга аналлаах пааматынньык сөргүтүллүө, спортивнай былаһааккалар уо.д.а. тутуллуохтара.
Раиса Сибирякова, «Саха сирэ» edersaas.ru