Чурапчы норуодунай тыйаатыра – Сочитааҕы бэстибээл Гран-при хаһаайына!
Кулун тутар 26 күнүгэр Сочи куоракка саҕаламмыт Бүтүн Арассыыйатааҕы «Сүрүн оруолга» театральнай бэстибээлгэ Саха Өрөспүүбүлүкэтиттэн РСФСР уонна Саха АССР норуодунай артыыһа Петр Михайлович Решетников аатынан Чурапчытааҕы норуодунай тыйаатыр Чингиз Айтматов «ИЙЭ СИРЭ» (режиссер Иван Бушков) испэктээгинэн кыттан, Гран-при үрдүк аатын ылла!
Маны сэргэ тыйаатыр бэйэтин номинациятыгар I истиэпэннээх лауреат буолла.
Оттон «Бастыҥ дьахтар сүрүн оруола» анал аат Чурапчы норуодунай тыйаатырын артыыһа Надежда Заболоцкаяҕа (Толгонай), «Бастыҥ музыка» анал аат Иван Бушковка иҥэрилиннилэр.
Маннык үтүө сонунунан биһигинниин Чурапчыттан Мария Герасимова үллэһиннэ.
Бу «ИЙЭ СИРЭ» испэктээгин тыйаатыр 2015 сыллаахха туруорбута уонна бастаан Хабаровскайга ыытыллыбыт «Дальневосточный бенефис» театральнай бэстибээлгэ Гран-при буолбута. Онтон 2о17 сыллаахха Иркутскай уобаласка Ольхоҥҥо Норуоттар икки ардыларынааҕы бэстибээлгэ дипломант, оттон бу билигин Бүтүн Арассыыйатааҕы куонкуруска бастаан, ГРАН ПРИ буолла!
Маныаха, үс бэстибээлгэ үһүөннэригэр талааннаах артыыс Надежда Михайловна Заболоцкая «Бастыҥ дьахтар сүрүн оруола» («Лучшая главная женская роль») үрдүк наҕарааданы ылла.
Быйыл 50 сааһын — кыһыл көмүс үбүлүөйүн бэлиэтиир Саха сирин киэн туттуута – Чурапчы норуодунай тыйаатырын айар кэлэктиибин истиҥник эҕэрдэлиибит! Үбүлүөйдээх сылгытыгар бу кыайыы чахчы даҕаны, күндү бэлэҕинэн буолар.
Татьяна Маркова.