Чурапчы көһөрүллүүтүн өйдөбүнньүгэр 2 мөлүйүөнтэн тахса солкуобай хомулунна (ВИДЕО)
Улуу Кыайыы күнүн иннинэ – ыам ыйын 6 күнүгэр, Чурапчы сэлиэнньэтигэр, Аҕа дойду Улуу сэриитин сылларыгар Чурапчы оройуонун холкуостарын хоту күүс өттүнэн көһөрүү 75 сылынан Чаачыгый сиригэр Өйдөбүнньүк тутуутугар аналлаах телемарафон биллэриллэн, ыытылынна. edersaas.ru
Онуоха, улуустааҕы Култуура уонна духуобунай сайдыы управлениетын (начаалынньык Д.Д.Попов) үлэһиттэрэ, сүбэлэһэн баран, хамнастарыттан 1000-лыы солкуобайы пааматынньык тутуутун фондатыгар киллэрэргэ быһаарыммыттара итиэннэ, улууспут ааспыт историятын бука бары кэриэстээн, быйылгы бачыым олоххо киирэригэр күүс-көмө буолуоҕуҥ, диэн улуус олохтоохторугар ыҥырыы таһаарбыттара.
Ыҥырыыны Чурапчы нэһилиэнньэтэ, дьон-сэргэ, тэрилтэлэр, нэһилиэктэр уонна көһөрүүттэн төннүбэккэ атын улуустарга, куораттарга олохсуйбут дьон оҕолоро-сиэннэрэ эмиэ, бары көхтөөхтүк өйөөтүлэр.
Бу, “Үйэлэргэ умнуллубатын, хатыламматын!” Амарах санаа телемарафонун суруналыыс Лена Дьячковская – Сэниэ Илгэ иилээн-саҕалаан ыытта.
Телемарафон түмүгүнэн 2 мөлүйүөн 198 тыһыынчаттан тахса солкуобай суумалаах үп хомулунна. Биллэрин курдук, бу үп Чаачыгый сиригэр Көһөрүллүү өйдөбүнньүгэ — Мемориальнай комплекс (В.Н.Дьячковскай бырайыагынан) тутуллуутугар итиэннэ кинигэ тахсыытыгар ананар.
Оттон ыам ыйын 9 күнүгэр Чурапчыга буолбут Кыайыы параадыгар Көһөрүллүү 75 сылынан 75 сүүрүк-спортсменнар 75 килэмиэтири сүүрэн кэлбиттэрин туһунан араапар биэрдилэр.
Ити курдук, Чурапчы дьоно түмсүүлээҕин, биир санаалааҕын өссө төгүл көрдөрдө.
Ыспыраапка:
75 сыл анараа өттүгэр,1942 сыллаахха, БСК(б)П Саха уобаластааҕы кэмитиэтин бюротун сыыһа дьаһалынан, Чурапчы оройуонун 41 холкуоһа, 1655 хаһаайыстыбата, оҕолуун-улаханныын 5318 киһи, хотугу оройуоннарга – Кэбээйигэ, Эдьигээҥҥэ, Булуҥҥа, балык үлэтигэр, күүс өттүнэн көһөрүүгэ ыытыллыбыта.
Аҕа дойду Улуу сэриитин сылларыгар фроҥҥа Чурапчы оройуонуттан уопсайа 2237 киһи саа-саадах тутан, дойдубутун өстөөхтөн көмүскүү барбыта. Кинилэртэн 928 буойун сэрии толоонугар дьоруойдуу охтубута, сураҕа суох сүппүтэ.., 1309 киһи тыыннаах эргиллэн кэлбитэ.
Оттон, күүс өттүнэн көһөрүллүүгэ ыытыллыбыт чурапчылартан үс хотугу оройуоҥҥа уопсайа 2000 кэриҥэ киһи (мантан 1248 киһи Кэбээйигэ) тоҥон, аччыктаан, ыалдьан суорума суолламмыта.
Өскөтүн 1940 сыллаахха Чурапчы оройуонун нэһилиэнньэтин ахсаана 17000 эбит буоллаҕына, 1943 сыл түмүгүнэн 7934 киһи хаалбыта. 46 сыл ааспытын эрэ кэннэ, 1985 сыл түмүгүнэн, улуус сэрии иннинээҕи көрдөрүүтүн ситиспитэ.
Чурапчы улууһун салалтатын 2004 сыллааҕы уурааҕынан балаҕан ыйын 19 күнэ Кэриэстэбил күнүнэн биллэриллибитэ.
Татьяна Маркова, «Саха сирэ» хаһыат, edersaas.ru