Кыайыы Маны аах

Чурапчы көһөрүллүүтүн 80 сылын көрсө

Бүгүн, балаҕан ыйын 19 күнүгэр, Чурапчы көһөрүллүүтүн 79 сыла бэлиэтэнэр. Эһиил 80 сылын көрсө манна аналлаах тэрээһин бүгүн Емельян Ярославскай аатынан хоту дойду норуоттарын култууратын уонна историятын холбоһуктаах судаарыстыбаннай музейыгар буолан ааста.

Балаҕан ыйын 19 күнэ Чурапчы улууһуттан хоту көһөрүллүүгэ барбыт дьону ахтан-санаан ааһар кэриэстэбил күнүнэн биллэриллэн турар. Санатан эттэххэ, 79 сыл анараа өттүгэр 1942 сыллаахха Чурапчы 41 холкуоһун хоту улуустарга балыктааһыҥҥа көһөрүүгэ ыыппыттара. Барыта биэс тыһыынчаттан тахса киһи көһөрүллүбүтүттэн, икки тыһыынча кэриҥэ киһи суорума суолламмыта.

Музейга сыл устата өрөспүүбүлүкэ 100 сылыгар аналлаах улуустар быыстапкалара турдулар. Музей сырдатар, үөрэтэр салаатын сэбиэдиссэйэ Октябрина Максимова иһитиннэрбитинэн, ааспыт нэдиэлэҕэ бу чэрчитинэн “Булуҥ улууһа – Арктика чыпчаала” диэн Булуҥ улууһун быыстапката арыллыбыта.

– Бу быыстапкаҕа Булуҥ, Нам улуустарын музейдара, маастардара кыттыыны ыллылар. Ону сэргэ быыстапкаҕа Чурапчы улууһун колхуостара күүс өттүнэн көһөрүүгэ барбыттара 80 сылыгар аналлаах стендэлэр турдулар. Бу быыстапка чэрчитинэн, бүгүн кэриэстэбил күнүгэр аналлаах тэрээһин ыыттыбыт. Манна даҕатан эттэххэ, Чурапчы улууһун Кытаанаҕар төрөөбүт, ССРС, РСФСР, Саха АССР үтүөлээх тренерэ Дмитрий Петрович Коркин Булуҥ улууһугар үөрэнэ сылдьан олорбут паартата биһиги музейбытыгар быыстапка чэрчитинэн эмиэ кэлэн турар. Быыстапка алтынньы 13 күнүгэр диэри туруоҕа, – диэн кэпсиир Октябрина Петровна.

Кэпсэтиини Култуура үтүөлээх үлэһитэ Татьяна Гоголева иилээн-саҕалаан ыытта. Кини бэлиэтииринэн, бу маннык тэрээһиннэр, бастатан туран, ыччакка туһуланаллар.

– Бүгүн эдэр дьон кэлэн олороллоруттан биир бэйэм астынабын. Балаҕан ыйын 19 күнэ – биһиги өрөспүүбүлүкэбит биир умнуллубат даатата буолар. Бүгүн дьоммутун-сэргэбитин, оччотооҕу көлүөнэ аас-туор олоҕу олорон ааспыт кэмин ахтан-санаан ааһар күн. Историябытын хас биирдиибит кэлэр кэнчээри ыччаппытыгар санатар, кэпсиир эрэ буоллахпытына, кинилэр ааттара тыыннаах буолуоҕа, – диэн этэр кини.

Тэрээһиҥҥэ хоту дойдуга көһөрүүгэ барбыт дьон оҕолоро, сиэннэрэ кыттыыны ыллылар. Кинилэр ааттарыттан Уус Маайа улууһун олохтооҕо, 80-ча сыл анараа өттүгэр биэс саастааҕар Булуҥҥа дьонун кытары көһөрүллүүгэ барсыбыт билигин Дьокуускайга оҕолоругар кэлэ сылдьар Зоя Захарова-Ягодина тыл эттэ, оччотооҕу кэмин ахтан ааста.

Аграфена КУЗЬМИНА, edersaas.ru

ааптар хаартыскаҕа түһэриилэрэ.

2
0