Чурапчы көхтөөх ыччата «Маарыкчаан ыччаттара» пуорумҥа түмүстэ
Бу күннэргэ Чурапчы улууһугар «Маарыкчаан ыччаттара» диэн үөрэтэр аналлаах пуорум буола турар. Бу тэрээһин чэрчитинэн, ыччат грант хайысхаларынан олоххо киириэхтээх бырайыактарын билиһиннэрдилэр. Бу туһунан Чурапчы улууһун дьаһалтатын пресс-сулууспата иһитиннэрэр.
Пуорум кыттыылаахтарын Чурапчы улууһун баһылыга Андрей Ноговицын, улуустааҕы дьокутааттар сэбиэттэрин бэрэссэдээтэлэ Афанасий Захаров эҕэрдэлээтилэр. Улуус баһылыга ыччаты кытта үлэлиир Чурапчытааҕы координационнай сэбиэт ыччат бэлиитикэтэ сайдарыгар үтүө үлэни ыытарын бэлиэтээтэ. Оттон Афанасий Захаров пуорум ыччат сайдарыгар туһалаахтык ааһарыгар баҕарда.
Чурапчы ыччатыгар Дьокуускайтан «Индустрии будущего» киин дириэктэрэ Иван Степанов, уопастыбанньык, блогер Сардаана Сыромятникова, хаартыскаҕа түһэрээччи, айанньыт Сюзанна Седалищева, Чурапчы улууһугар тыа хаһаайыстыбатын сайдыытын ааҕыныстыбатын салайааччы Василий Хомподоев, Чурапчытааҕы физкултуура уонна успуорт институтун волонтердарын киинин салайааччы Галина Алексеева, «Миэдик волонтердар» Арассыыйатааҕы хамсааһын Чурапчытааҕы филиалын бэрэссэдээтэлэ, терапевт быраас Людмила Тарабукина уо.д.а. бэйэлэрин уопуттарын үллэһиннилэр, сүбэ-ама биэрдилэр.
Пуорумҥа Амматтан улуус баһылыгын солбуйааччы Саргылаана Неустроева салайааччылаах уон ыччат кэлэн көхтөөх кыттыыны ылла, Аммаҕа ыччаты кытта үлэ хайдах ыытылларын билиһиннэрдилэр.
Бу тэрээһини Чурапчы улууһун дьаһалтата, «Айылгы» норуот айымньытын дьиэтэ, Чурапчы улууһун ыччакка координационнай сэбиэтэ уонна уопсастыбаннай тэриллиилэр иилээн-саҕалаан ыыттылар.
Хаартыскалар — пресс-сулууспаттан.