Чурапчы IT-киинэ тыа сирин үлэһит дьонугар мобильнай сыһыарыыны оҥордо
Ааспыт сыл бүтүүтэ өрөспүүбүлүкэ араас муннуктарыгар IT-кииннэр аһыллыбыттара. Кинилэр саҥа бырайыактара номнуо олоххо киирэн эрэллэр.
edersaas.ru
Чурапчыга IT-киин үлэһиттэрэ кылгас кэм иһигэр “Сохрани чек” диэн мобильнай сыһыарыыны оҥордулар. Бу сыһыарыы көмөтүнэн, бааһынай хаһаайыстыбалаахтар уонна тус көмө хаһаайыстыбалаахтар үп-харчы бастакы докумуоннарын Чурапчы улууһун тыатын хаһаайыстыбатын сайыннарар Ааҕыныстыба дааннайдарын баазатыгар харайыахтарын сөп. Бу туһунан улуус дьаһалтатын пресс-киинэ иһитиннэрэр.
Сыһыарыы буҕаалтыр, нолуок суотун-учуотун оҥорорго табыгастаах буоллун диэн оҥоһулунна. Ону таһынан, үп-харчы тэрээһинин, дьиэ-кэргэн экэниэмикэтин сөптөөхтүк тутарга туһуланар.
—Чурапчы дьаһалтата ыытар бэлиитикэтин көмөтүнэн, тыа хаһаайыстыбатын цифровизациялааһыҥҥа улуус улахан хардыыны оҥорон эрэр. Холобур, бааһынай хаһаайыстыбалаах Уйбаныап каарта нөҥүө күрдьэх, атырдьах, тыраахтар сапчаастарын атыылаһар. Ол чиэктэрэ тута бу сыһыарыыга киирэн иһэр. Оттон чиэктэрин куоппуйата тута IT-кииҥҥэ кэлэр уонна тус паапкаҕа харайыллар. Отчуот кэмэ кэллэҕинэ, хаһаайыстыбалаах киһи бу паапкаттан наадалаах докуомуоннарын таһааран тустаах дьоҥҥо биэрэр, отчуоттуур. Бу олус табыгастаах. Олох көрдөрөрүнэн, кыра чиэктэри төһө да хараҕын харатын курдук харай, биир эмэ кумааҕы сыыһа син биир тиийбэт буолар. Оттон бу сыһыарыы биир да чиэги төлө түһэрбэт, онон, отчуоту оҥорорго, биллэрдик чэпчиэххит, – диэн киин салайааччыта Иннокентий Бекянов этэр.
Бу сыһыарыы кыаҕа кэҥээн иһиэҕэ. Номнуо атын тэрилтэлэр сэҥээрдилэр. Ол курдук, Тыа хаһаайыстыбатын сайдыытын ааҕыныстыбата култуура уонна социальнай харалта тэрилтэлэрин кытта сөбүлэҥ түһэрсэн эрэллэр.
Маны таһынан, IT-кииҥҥэ информационнай технология исписэлиистэригэр анаан үлэ усулуобуйата тэриллиэҕэ.
Санатар буоллахха, Чурапчытааҕы IT-киин ааспыт сыл ахсынньытыгар, СӨ Инновация, цифровой сайдыы уонна инфокоммуникационнай технология министиэристибэтин гранын көмөтүнэн тэриллибитэ.
Виктория Бястинова, edersaas.ru