Чурапчы икки нэһилиэгэр баһылыктар быыбарга 90-тан тахсалыы бырыһыаны ыллылар
Чурапчы улууһун Мырылатыгар уонна Хоптоҕотугар бу өрөбүллэргэ баһылыктар быыбардара буолан ааста. Икки нэһилиэккэ “Биир ньыгыл Арассыыйа” туруорбут кандидаттара кыайдылар.
Хоптоҕо нэһилиэгэр икки кандидат быыбарга кытынна. Нэһилиэнньэ 53,18% тахсан куоластаата. Куоластааһын түмүгэр бэйэ кандидатуратын туруоруммут Петр Слепцов 3,76% ылла. Оттон “Биир ньыгыл Арассыыйа” баартыйаттан быыбарга турбут Алексей Бурцев 95,58 % куолаһы ылан, улуус биир улахан нэһилиэгин баһылыгынан талылынна. Алексей Леонидович бу иннинэ Чурапчы нэһилиэгин баһылыгын бастакы солбуйааччынан үлэлии олорбута.
Соловьев нэһилиэгэр, Мырылаҕа, нэһилиэнньэ 58,13% быыбарга кытынна. Быыбарга эмиэ икки кандидат турбута. Бэйэ кандидатуратын туруоруммут Алексей Егоров 4,12 % куолаһы ылла, оттон “Биир ньыгыл Арассыыйаттан” турбут Василий Хомподоевка нэһилиэнньэ 94,65 % куоластаата. Василий Васильевич Чурапчы улууһун депутата, улууска тыа хаһаайыстыбатын сайдыытын агентствотын салайааччыта.
Онон бу икки нэһилиэккэ олохтоохтор 90-тан тахсалыы бырыһыаны биэрэн, баһылыктарын биир киһи курдук таллылар.
Аграфена КУЗЬМИНА