Чурапчыга Хайахсыт нэһилиэгин олохтооҕо Александр Поисеев ааспыт субуотаҕа тыраахтарынан мас тиэйэн иһэн, бөһүөлэктэн уонча биэрэстэлээх Үлүйбүт алааска сылгы өлүгэ сытарыгар түбэспит. Өссө тыраахтар уотугар бөрө хараҕа умайарын көрөн аһарбыт. Онон, биэни сурдар тардыбыттарыгар саарбахтаабатах. Бу туһунан миэхэ Хайахсыт нэһилиэгин дьаһалтатын баһылыгын эбээһинэһин толорооччу Герман Егоров бүгүн куоракка киирэ сылдьан кэпсээтэ.
Нэһилиэк тыа хаһаайыстыбатыгар исписэлииһэ Василий Борисов, бэтэринээр-быраас Нюрбина Назарова уонна бэтэринээр-биэлсэр Николай Ксенофонтов алааска тиийэн, биэ сэмнэҕин көрөн аакталаабыттар. Кинилэр адьырҕалар алааһы бүтүннүү тэпсибит суолларынан сирдэтэн, биир улахан бөрөнү кытта үс оҕо бөрө кэлэн барбыттарын быһаарбыттар. Куҥ этин бүтүннүү сиэбиттэр. Онон бэлиэтэ суох, ким сылгыта буолара биллибэт.
Үлүйбүт алааска сылгы сэмнэҕэ ыраахтан көстөр
Бөрө баппаҕайа тырахтарыыс Александр Поисеев сутуругун саҕа
Кырдьаҕас биэ тоҕо эрэ үөрүттэн ойдон, соҕотоҕун сылдьыбыт. Эрэйдээҕи алааһы биир гына төттөрү-таары эккирэтэ сылдьан, такымнарын быһыта тардан, иҥиирдэрин биир-биир сыыйан, сордоон-муҥнаан өлөрбүттэрин чигди буолбут хаар кэпсии сытар. Сиэмэх кыыл оҕолорун бултуурга уһуйдаҕа. Нэһилиэк 90-ча саастаах ытык кырдьаҕаһа, урут отделениеҕа управляющайдаабыт Михаил Егорович Васильев бөрө сылгыны тардыбытын истэн баран, Хайахсыт сиригэр хаһан да үктэнэ илик кыыл буулаабытыттан улаханнык соһуйбут уонна: “Тот бөрө сылгынан оонньуур”, — диэбит.
Герман Иванович сабаҕалыырынан, ити Амма диэкиттэн тахсыбыт кыыллар олохсуйан эрэр буолуохтаахтар. Чакыр эҥээригэр бааллара эрдэ биллибит үһү. “Аны саас сылгы ырыганныырын саҕана өссө кутталланыахтара. Улуустааҕы ыксаллаах быһыы-майгы кэмитиэтигэр сүбэ мунньах буолбутугар ордубут уматыгы адьырҕалары сонордоһорго туһанарбытыгар көҥүллээтилэр”, — диир Хайахсыт баһылыгын эбээһинэһин толорооччу.
Арыылаах диэки Танда-Баайаҕа бастарыгар 5 эдэр бөрө ордууланар үһү. Чурапчы улууһугар идэтийбит 4 бөрөһүт-булчуттаахтар. “Биһиэхэ, бөрөтө суох дойдуга, бөрөһүппүт суох. Көҥүлэ суох буоламмыт, санаммакка да сылдьыбыппыт. Экология министиэристибэтигэр Николай Додоховка киирэн кэпсэппиппэр, “сурдары сонордоһуҥ” диэн көҥүллээтэ. Онон олохтоох уолаттартан сөбүлэһэр киһи баар буоллаҕына, биригээдэ тэринэн, мантан инньэ бултаһыахпыт. Билиҥҥэ диэри хаарбыт букатын чараас. Тараахтаан, күрэтэн бултаһар буоллар, ордук табыллыах эбитэ дуу…” – диэн санаалаах Герман Егоров.
Василий НИКИФОРОВ.