Чурапчы улууһугар Хадаар нэһилиэгэр тыа сирин биир кэлим сайыннарыы анал бырагырааматынан Бөһүөлэк сайдар киинэ диэн спортивнай саалалаах, аныгы кэм ирдэбилигэр эппиэттиир IT-библиотекалаах эбийиэк тутулла турар. Билигин киин сыбаайатын түһэрэ сылдьаллар.
Тутууну барытын “ДСА” хампаанньа иилээн-саҕалаан ыытар. Спортивнай саала олугун оҥорууга “Сэттэ” хампаанньа бэдэрээттэһэн үлэлиир.
“Билигин 40-тан тахса сыбаайа түһэн турар. Ойуур баһаардара тураннар, тутуубут матырыйаала кэлиитигэр харгыстары үөскэтэ сырыттылар. Сыбаайаларбыт аҥаардара икки күннээҕитэ кэлэннэр, билигин өссө 30 сыбаайаны түһэриэхпит. Биригээдэбитигэр алтыабыт”, – диэн иһитиннэрэр тутар, монтажтыыр үлэ маастара Семен Яковлев.
Буровик Эмиль Ксенофонтов этэринэн, киин ирбэт тоҥҥо тутуллар буолан, 20 миэтирэ уһуннаах сыбаайалары түһэрэллэр. “Социальнай эбийиэктэртэн Хаҥалас улууһун Өктөмүгэр, Мэҥэ Хаҥалас Аллараа Бэстээҕэр, о.д.а. сирдэргэ оскуола олугун оҥорбуппут. Саамай уустук эбийиэктэрбититтэн Дьокуускай куоракка Перинатальнай киин, Сүрэх, тымыр ыарыытын эмтиир балыыһа буолаллар. Билигин үлэлии сылдьар эбийиэкпитигэр 2,5 миэтирэттэн саҕалаан муус, онон уустуктары үөскэтэр. Икки уһун сыбаайалары холбуу-холбуубут түһэрэбит”, – диэн бэлиэтиир кини.
Хадаар нэһилиэгин баһылыга Иван Васильев иһитиннэрбитинэн, киин эһиил олоххо киириэхтээх. Бу бырайыак РФ тыатын хаһаайыстыбатын министиэристибэтэ ыытар анал бырагырааматынан тутуллар. “Тыа сирин биир кэлимник сайыннарыы бырагырааматыгар киирсэн, бу бырайыагы көмүскээбиппит. Тутуу барыта 136 мөлүйүөн солкуобайдаах. Уопсай иэнэ 1300 кв м тэҥнэһэр. Манна спортивнай сааланы таһынан аныгылыы IT-библиотека аһыллыаҕа. Онон дьоммут-сэргэбит, ыччаттарбыт эт-хаан, өй-санаа өттүнэн сайдалларыгар төһүү буолуоҕа”, – диэн бэлиэтиир Иван Гаврильевич.
Аграфена КУЗЬМИНА, edersaas.ru