Чурапчы улууһун баһылыга Андрей Ноговицын Соловьев нэһилиэгэр, Хахыйах учаастагар сылдьан, күннээҕи үлэни-хамнаһы билистэ.
edersaas.ru
«Хаарбах дьиэттэн дьону көһөрүү» бырагырааманан манна икки түөртүү кыбартыыралаах дьиэ тутуллан, ыам ыйыгар үлэҕэ киллэриллиэхтээхтэр. Учаастакка барыта 70 киһи олорор, бүддьүөт тэрилтэлэригэр үлэлииллэрин таһынан, ыаллар сүөһү-сылгы ииттэн, үүт уонна эт туттаран дохуоттаналлар.
Соловьев нэһилиэгин дьаһалтатын баһылыга Мария Кронникова этэринэн, сүүрбэ сыл устатыгар туох даҕаны тутуу ыытыллыбатах учаастагар икки саҥа дьиэ тутуллуута улахан сабыытыйа буолар. Аны оскуола хапытаалынай өрөмүөнү эрэйэр эбит, манна 19 оҕо үөрэнэр.
Короновирустан сэрэхтээх буолуу дьаһалынан, билигин Хахыйахха туох да маассабай тэрээһин буолбат, култуура, спорт тэрилтэлэрэ сабыллан тураллар, оттон оскуола үлэлиир. Бу туһунан улуус дьаһалтата иһитиннэрэр.
Раиса Сибирякова, «Саха сирэ» edersaas.ru