Сүөһүлэр ыалдьыбакка-сүппэккэ, күөх сайын устата уойалларын-төлөһүйэллэрин туһугар Чурапчытааҕы бэтэринээринэй управление исписэлиистэрэ нэһилиэктэринэн сылдьан, хаһаайыстыбалары бэрэбиэркэлииллэр.
Соловьев нэһилиэгэ кыстыгы көрсө 2 тыһ. 572 туоннаны оттуур былааннааҕыттан, билиҥҥитэ 474 туонна оту чөкөппүт. От хаачыстыбата үчүгэй. Сүөһүлэр туруктара куһаҕана суох, үүтү ыаһыҥҥа сорудах толоруллан иһэр. Хаһаайыстыбалар арай, искусственнай сиэмэлээһини тэрийиигэ кэдэйэн биэрбиттэр. Балачча элбэх ынах кытараабыт. Бу охсуута элбэҕин киһи барыта билэр: ынах төрөөбөтөҕүнэ үүт ыаммат, ыал ылыахтаах дохуотун сүтэрэр. Онон, нэһилиэк дьаһалтата бу өттүгэр былааннаахтык үлэлиирэ наада буолбут.
Болугур нэһилиэгэ 2 тыһ. 844 туоннаны оттуур сорудахтааҕыттан 423 туонна оту кэбиспит. От хаачыстыбата эмиэ үчүгэй. «Мындаҕаайы» кэпэрэтиип 130 ыанар ынахтаах, күн ахсын 1,3 туонна киилэ үүтү ыан туттарар. Кыстык хотонун ыраастаабыт, дезинфекциялаабыт. Сүөһүлэрин Халбаныкы сайылыгар таһаарбыт. Титиигэ толору хааччыллыылаах, ынахтар аппараатынан ыаналлар, туруктара үчүгэй, биир ынах күҥҥэ түөрт-биэс киилэ комбикорманы сиир. Ньирэйдэр туспа тутуллаллар, мэччирэҥҥэ сылдьаллар, үүтүнэн уонна хааһынан аһыыллар, битэмииннээх минеральнай аһы эбии сииллэр.
Бэтэринээрдэр 45 ньирэйгэ чип кэтэртилэр, мөлтөх туруктаах уонна ороһулаан төрөөбүт кыра ньирэйдэргэ битэмииннээһин оҥордулар. Ыанньыксыттарга, ньирэйи көрөөччүлэргэ, бостууктарга сүөһүнү көрүүгэ-истиигэ сүбэ-ама биэрдилэр.
Раиса СИБИРЯКОВА, “Саха сирэ” хаһыат, edersaas.ru