Бэҕэһээ ойуур баһаара Чурапчы улууһун Хоптоҕо нэһилиэгин Мэлдьэхси учаастагар чугаһаан, нэһилиэнньэни киин бөһүөлэккэ Дириҥҥэ көһөрдүлэр. Билигин минерализованнай балаһалары оҥорууга сэттэ тыраахтар үлэлии сылдьар.
“Бу күннэргэ күүстээх тыал түһэн Мэлдьэхсибит сиригэр ойуур баһаара барда. Уот тыа үрдүнэн көтөр буолан, кылгас кэм иһигэр улаатан таҕыста. Билигин нэһилиэнньэлээх пууҥҥа Мэлдьэхсигэ киирэрин бопсобут. Онон нэһилиэкпит эр дьоно бары мустан, ону таһынан улуус суһал ыстаабын нөҥүө баҕалаах дьон кэлэн баһаары умуруорууга үлэлии сылдьаллар. Минерализованнай балаһаны оҥорууга сэттэ тыраахтар үлэлиир. Нэһилиэк уонна улуус баһаарынай чааһыттан массыыналар кэлэн бөһүөлэк кытыытыгар тураллар”, – диэн Хоптоҕо нэһилиэгин баһылыга Борис Архипов төлөпүөнүнэн иһитиннэрэр.
Санатан суруйдахха, Мэлдьэхси учаастага Чурапчы улууһун биир түгэх нэһилиэнньэлээх пуунунан буолар. Учаастак нэһилиэк кииниттэн 20 биэрэстэ ыраах сытар. Чурапчы улууһун Мугудай нэһилиэгин, Мэҥэ Хаҥалас улууһун Сыымаҕын, Суолатын кытары кыраныыссалаһар. Нэһилиэк дьоно-сэргэтэ саамай оттуур ходуһалар бу сиринэн тарҕанан сытар.
“Дьон оттообут отун быыһыырга нэһилиэнньэбит бэйэтэ түмсэ охсон ким туох тиэхиньикэлээҕинэн бэйэ-бэйэлэригэр көмөлөһө сылдьар. Ол эрээри сорох кэбиһиилээх отторбутун кыайан быыһаабатыбыт”, – диэн Борис Петрович этэр.
Улуус баһылыга Андрей Ноговицын бэлиэтээбитинэн, түүн устата ойуур баһаара Мугудай нэһилиэгин диэки сыҕарыйда. “Мэлдьэхсигэ сайыҥҥы кэмҥэ 50-тан тахса киһи олорор. Бэҕэһээ сэрэтэр сыалтан кырдьаҕастары, оҕолору көһөрдүбүт. Билигин баһаарга 300-чэкэ киһи үлэлии сылдьар. Ону таһынан нэһилиэк, улуус тиэхиньикэлэрин мустубут. Билигин Мэҥэ Хаҥаластан Чурапчыттан икки сиринэн уоту умуруоруу бара турар”, – диэн этэр кини.
Аграфена КУЗЬМИНА, edersaas.ru