Айылҕа харыстабыла Маны аах

Чурапчы баһаарыгар 493 киһи үлэлиир

Чурапчы улууһугар билигин Хоптоҕо, Мугудай, Хайахсыт нэһилиэктэринэн ойуур баһаара бара турар. Уот ылбыт сирэ 27 тыһыынча гектарга тэҥнэстэ.

Билиҥҥи туругунан, баһаары умуруорууга 493 киһи, ол иһигэр “Якутлесресурс” тэрилтэ сэттэ үлэһитэ, 379 нэһилиэнньэттэн хомуллан, баһаарынай чаастартан 35 үлэһит, ЫБММ 72 киһи кэлэн үлэлии сылдьаллар. Хоптоҕо, Мугудай, Хадаар, Хайахсыт нэһилиэктэригэр икки хос минерализованнай балаһалар оҥоһуллубуттара. Ону таһынан ойуурга киһи киирэр сиринэн уоту умуруора сылдьаллар.

Баһаарга үрдүк күүрүүлээх уот ситимэ хаарыллан, билигин чөлүгэр түһэриигэ улахан үлэ бара турар. Санатан эттэххэ, баһаарга сэттэ остуолба эмсэҕэлээн, Чурапчы улууһун сорох нэһилиэктэрэ уота суох олороллор. Энергетиктэр бэлиэтээбиттэринэн, үлэ бу нэдиэлэҕэ чэппиэргэ диэри түмүктэниэхтээх.

Ааспыт нэдиэлэттэн Айылҕа харыстабылын миниистирин бастакы солбуйааччы Семен Яковлев тиийэн үлэлии сылдьар. Бэҕэһээ Ыксаллаах быһыы-майгы миниистирин солбуйааччы, генерал-полковник Александр Чуприян, СӨ бырабыыталыстыбатын бэрэссэдээтэлин солбуйааччы Дмитрий Садовников, ЫБММ салйааччыта, генерал-майор Павел Гарин Чурапчыга тиийэн үлэни-хамнаһы көрөн барбыттара. Мугудайга, Мэлдьэхсигэ, Хадаарга, Хайахсыкка сылдьан туох үлэ барбытын көрдүлэр, нэһилиэнньэни кытары көрүстүлэр, ону сэргэ көмөҕө кэлбит ЫБММ үлэһиттэрин кытары кэпсэттилэр. Ол түмүгүнэн Чурапчы уонна Мэҥэ Хаҥалас улуустарын салалтата ойуур баһаарын умуруорууга сөптөөх үлэни ыыппыттарын бэлиэтээтилэр.

Чурапчы улууһугар тахсыбыт ойуур баһаара билигин да күөдьүйэн тахсар кутталлаах. Онон түүннэри-күнүстэри кэтээн көрүүнү күүһүрдэн биэрдилэр.

Аграфена КУЗЬМИНА.

0
0