Бу күннэргэ Москваҕа «Көҕүлээһин бүддьүөтэ уопсастыбаннай хамсааһын быһыытынан» диэн Бүтүн Сойустааҕы үһүс кэмпириэнсийэ буолан ааста.
Манна түөрт номинацияҕа бастыҥнары бэлиэтээтилэр. Уопсайа куонкуруска Арассыыйа 60 эригийиэниттэн 915 бырайыак киирбититтэн 12 бырайыак бастыҥынан бэлиэтэннэ. Чурапчы улууһун Чурапчы сэлиэнньэтин норуот айымньытын «Айылгы» дьиэтэ «Уопсастыбаннай кыттыы» диэн номинацияҕа кыайыылааҕынан таҕыста.
Бу тэрилтэ эдэр эрчимнээх салайааччыта Петр Гуляев бэлиэтииринэн, бырайыагы олоххо киллэриигэ 2852 киһи кыттыбыт.
— Култуура дьиэтин өрөмүөнүгэр бар дьоммут 275 тыһыынча солкуобайы кыттыспыттара. 1,5 мөлүйүөн солкуобай өрөспүүбүлүкэ бүддьүөтүттэн, 225 тыһыынча солкуобай олохтоох бүддьүөттэн киирбитэ. Биһиги бу кыайыыбытынан кынаттанан, саҥа атын бырайыактары олоххо киллэриигэ ылсыахпыт. Биһигини СӨ Үпкэ министиэристибэтэ уонна улууспут салалтата сүбэ-ама буолан өйөөтүлэр. Салгыы бииргэ үлэлээһиҥҥэ бэлэммит уонна тэрилтэбит материальнай базатын хаҥатыыга сонун сүүрээннэри тобулуохпут, — диэн Петр Гуляев санаатын үллэһиннэ.
«Саха сирэ» хаһыат кэлэр чэппиэрдээҕи нүөмэригэр Москваҕа буолбут суолталаах тэрээһиҥҥэ Чурапчы улууһуттан тиийэн ситиһиилээхтик кыттыбыт уонна улахан наҕарааданы ылбыт салайааччылары кытта кэпсэтиини ааҕаарыҥ.
Елена ПОТОЦКАЯ, “Саха сирэ” хаһыат, edersaas.ru