Чурапчы улууһугар норуот дружината тэриллэн уопсастыбаннай бэрээдэги көрөр-истэр. Бу туһунан Чурапчы улууһун дьаһалтатын пресс-сулууспата иһитиннэрэр.
Оройуоҥҥа «2018-2022 сылларга Чурапчы улууһугар быраабы кэһии профилактиката» диэн муниципальнай таһымнаах бырагыраама үлэлиир. Манна норуот дружината уонна оройуоннааҕы ИДьМ үлэлииллэр.
«Бу сылга куонкурус түмүгүнэн өрөспүүбүлүкэ бүддьүөтүттэн 1,52 мөлүйүөн солкуобайдаах субсидия көрүллүбүтэ. Бииргэ үбүлээһин усулуобуйатынан улуус бүддьүөтүттэн 58 тыһыынча солкуобайы ыыппыппыт», — диэн улуус баһылыга Андрей Ноговицын кэпсиир.
Бүгүҥҥү күҥҥэ Чурапчы улууһун биэс нэһилиэгэр 199 дружинник баара бэлиэтэммит. Кинилэр дьон маассабайдык мустар сирдэригэр уопсастыбаннай бэрээдэги көрөллөр, быраабы кэһии тахсыбатын туһуттан рейдэлэри тэрийэллэр.
Быйыл коронавирус дьаҥа туран, Ил Дархан ыйааҕа кэһиллибэтин туһуттан улахан болҕомто санитарнай-эпидемиологическай ирдэбиллэргэ ууруллар. Маны таһынан, дружина чилиэннэрэ участковайдары кытта хааччахтанан олорор гражданнары хонтуруоллууллар.
Манна диэн суруйдахха, баҕа өттүнэн бэрээдэги көрөр-истэр дружина чилиэннэрин үлэлэрэ төлөнөр. Улуус баһылыгын дьаһалынан балаһыанньа бигэргэтиллибит. ДНД чилиэннэрэ бу күҥҥэ бары холбоон 95 тыһыынча солкуобайы хамнастаммыттар. Итиэннэ сотору кэминэн анал таҥаһынан, сириэстибэлэринэн хааччыллыахтара.
edersaas.ru