Чурапчы улууһун Арыылаах нэһилиэгэ олохтоох көҕүлээһиннэри өйүүр бырагыраамаҕа 2017 сылтан кыттар. Бастакы икки сылларга олохтоохтор күүстэринэн тутуллубут успуорт саалын итиппиттэрэ. Бу бырагырааманан ылбыт икки грааны успуорт сааланы ититиигэ уонна өрөмүөҥҥэ ыыппыттара.
Нэһилиэк баһылыга Николай Сыромятников этэринэн, бырагыраама кыра нэһилиэктэргэ олоххо киирэн көдьүүстээҕин дакаастаабыт. Олохтоохтор, фермердэр, тэрилтэлэр, биир дойдулаахтар түмсүүлэрэ бары бырайыак олоххо киирэригэр көхтөөхтүк кыттыбыттар.
«Нэһилиэк сайдарын туһугар хас биирдиибит кыттыгастаах, кылааттаах буоларын нэһилиэнньэ өйдөөтө. Чурапчы оройуонун дьаһалтата биһиги саҕалааһыннарбытын куруук өйүүр«, — диэн баһылык санаатын үллэстэр.
Олохтоохтор аны 1899 сыллаахха тутуллубут Николаевскай таҥара дьиэтин өрөмүөнүн бырайыагар ылсыахтара. Тутуу сыл аайы эргэрэн иһэр. Арыылаахтар бэйэлэрин күүстэринэн үлэни саҕалаары гыналлар уонна ону өрөспүүбүлүкэ өйүө диэн эрэнэллэр.
Олохтоох көҕүлээһиннэри өйөөһүн бырагырааматынан Саха сиригэр сыллата 400-тэн тахса бырайыак олоххо киирэр. Бырагыраама усулуобуйатынан, бырайыак үбүн улахан аҥаарын өрөспүүбүлүкэ бүддьүөтэ уйунар диэн. Атынын муниципальнай бүддьүөт уонна спонсор харчыта уйунуохтаах. Бу туһунан Чурапчы улууһун дьаһалтатын пресс-сулууспата иһитиннэрэр.
edersaas.ru
Хаартыска — пресс-сулууспаттан.