Чурапчыттан Ивановтар дьиэ кэргэн Бүтүн Арассыыйатааҕы «Сыл бастыҥ дьиэ кэргэнэ» күрэхтэһиигэ «Эдэр ыал» диэн номинацияҕа кыайдылар. Бу туһунан үөрүүлээх сонуну СӨ Үлэҕэ уонна социальнай сайдыыга министиэристибэтин пресс-киинэ иһитиннэрэр.
Министиэристибэ Саха сириттэн хас даҕаны ыалы бу күрэхтэһиигэ кытыннарда. Ол курдук, кыттааччыларбыт бары араас хабааннаах өрөспүүбүлүкэтээҕи күрэхтэһиилэр кыайыылаахтара буолаллар: Тааттаттан Кузьминнар («Үгэһи тутуһар дьиэ кэргэн»), Горнайтан Вензеллэр («Тыа сирин ыала»), Мэҥэ Хаҥаластан Афонскайдар («Элбэх оҕолоох ыал»).
Куонкуруска Арассыыйаттан 342 ыалтан сайаапка киирбит. Саамай элбэх кыттааччы «Элбэх оҕолоох ыал» уонна «Үгэһи тутуһар дьиэ кэргэн» номинацияларга баар эбит.
Биэс оҕолоох Чурапчы олохтоохторо Елена уонна Герман Ивановтар дьиэ кэргэн ааспыт сылга ыччат «ТАБЫС» бэстибээлигэр бастыҥ эдэр ыал аатын ылбытттара. Онно Ил Дархан Айсен Николаев аатыттан 300 тыһыынча солкуобайдаах сэртипикээти туппуттара уонна өрөспүүбүлүкэтээҕи «Сыл бастыҥ ыала» куонкуруска кыттар быраабы ылбыттара.
edersaas.ru