Чурапчы баһылыктара Төрүт Сокуоҥҥа уларытыылары киллэриини өйүүллэр

Чурапчы улууһугар Саха Өрөспүүбүлэкэтин тыатын хаһаайыстыбатын миниистирэ Александр Атласов бэс ыйын 16-17 күннэригэр ыытылла турар үлэни билистэ.

Александр Павлович улуус дьаһалтатыгар сүбэ мунньахха, видеоконференция сибээһинэн тыа хаһаайыстыбатын исписэлиистэрин кытта кэпсэттэ, 16 нэһилиэк баһылыгын хабан туран бөлөхтөрүнэн мунньахтарга кыттыыны ылла. Хайахсыкка тыа сирин кэлимник сайыннарыы бырагыраамматынан тутуллар саҥа оскуола-саад киириитин баран миэстэтигэр билистэ, нэһилиэк уопсастыбаннаһын кытта көрүстэ. Сырыытын сүрүн сыалынан ыһыы үлэтэ ыытыллыытын, окко киирии туругун, тыа сирин кэлимник сайыннарыы бырагыраама үлэтин хаамыытын, 2021 сылга тыа хаһаайыстыбатын салаатыгар саҥа хамсааһыннары киллэрии боппуруостарын тула киэҥ кэпсэтиини ыытта.

Икки күннээх үлэ түмүгүнэн дьон-сэргэ мунаахсыйар ыйытыыларыгар быһа хоруйдары ылан астыннылар, тыа хаһаайыстыбатын салаатынан сөптөөх үлэ ыытылларын, өрөспүүбүлүкэ тыатын сирэ сайдарын туһугар нэһилиэнньэҕэ үгүс көмө оҥоһулларын этэн туран махталларын биллэрдилэр.

От ыйын 1 күнүгэр буолаары турар РФ Төрүт Сокуонугар уларытыы киллэрэр куоластааһын туһунан ыйытыылар, этиилэр эмиэ киирдилэр. Баһылыктар Төрүт Сокуоҥҥа уларыйыы киирэрэ олохпут ирдэбилинэн сөптөөҕүн, сахалар биир сомоҕо буолан, ордук тыа сирин нэһилиэнньэлэрэ хайдыбакка, ыһыллыбакка улууспут баһылыгын, Ил Дархаммыт тула түмсэн биир санаанан куоластыаҕыҥ диэн ыҥырыы таһаардылар.

Тыа хаһаайыстыбатын миниистирин кытта көрсүү түмүгүнэн, улуус баһылыга Андрей Ноговицын улуус олохтоохторуттан киирбит этиилэри учуоттаан, быйылгы дьыл кураан буоларын сабаҕалаан бу боппуруоска болҕомто ууралларыгар, федеральнай трасса быстар мөлтөөбүтүн чөлүгэр түһэрэргэ бырабыытылыстыба өттүттэн күүскэ үлэлэһэллэригэр улуус олохтоохторун аатыттан этии киллэрдэ уонна Александр Павлович куратор буолан туран, Чурапчы улууһа сайдарын туһугар кыһалларыгар, көмөлөһөрүгэр улахан махталын биллэрдэ.

Чурапчы дьаһалтатын пресс-киинэ.