Чуораанчык — «Күннээх куорат» ыалдьыта

Ааптар: 
Бөлөххө киир:

Бу күннэргэ  «Чуораанчык», «Колокольчик+» өрөспүүбүлүкэтээҕи оҕо  сурунаалларын эрэдээксийэтэ Мэдисиинэ национальнай киинигэр  “Күннээх куоракка” ыалдьыттаата, үтүө санааланыы аахсыйатын тэрийэн ыытта.

edersaas.ru

Эрэдээксийэ кэлэктиибэ «Мисс Виртуальнай Уһун суһуох-2017» куонкурус кыттааччыларын усунуостарынан Мэдисиинэ киинигэр   аадырыстаан, 2018 сыл бастакы аҥаарыгар 20 устуука сурутууну бэлэхтээбитэ.

Бу күҥҥэ диэри “Чуораанчык”, “Колокольчик+” сурунааллар хантан кэлэллэрин, кырдьык, билбэт этибит. Оҕолор ыйга биирдэ кэлэр сурунааллары олус сэргээн ааҕаллар. Иитээччилэрбит оҕолору кытта үлэлэригэр туһаналлар. Онон маннык сурутууну ыыппыт эрэдээксийэ кэлэктиибигэр уонна “Уһун сууох-2017” куонкурус кыттыылаахтарыгар, кинилэр төрөппүттэригэр истиҥ махталбытын тиэрдэбит, — диэн педиатрия киинин иитээччитэ Елена Сивцева санаатын үллэһиннэ.

Бу күн “Күннээх куорат” оҕолоругар эрэдээксийэ кэлэктиибэ үс хайысханан тэрээһиннэри ыытта. Оҕолор “Сыл бэлиэтэ” куонкуруска киирбит үлэлэри — уустаан-ураннаан, мындырдаан оҥоһуллубут ыт арааһын сэргээн көрдүлэр, “Чуораанчык” сурунаал дьоруойдарын астына кырааскалаатылар, викториналарга, оонньууларга көхтөөхтүк кытыннылар, «Чуораанчык», “Колокольчик” буочтатыгар баҕа санааларын суруйдулар.

“Күннээх куоракка” буолбут тэрээһиҥҥэ Чуораанчык уол илэ бэйэтинэн тиийэн кэлэн оҕолору соһутта да, үөртэ даҕаны. Хас биирдиилэрин кытта илии тутуһан дорооболосто. Чуораанчыгы кытта умнуллубат көрсүһүү ыарыыны кытта охсуһар кырачаан оҕолорбутугар эрэли, күүстээх санааны биэрдин, тулалыыр олохторун киэргэттин!

edersaas.ru саайтка анаан Кристина ИВАНОВА (ХИФУ устудьуона).

+1
0
+1
0
+1
0
+1
0
+1
0
+1
0
+1
0