Көмүс күһүн кэлэн, аар айылҕабыт алтан көмүс суһумунан сууланан турар кэмигэр, оҕо саас уйата — оскуолабыт барахсан ыччатын ыҥырар чуораана чугдаарар. Бу күн ким эрэ аан маҥнай оскуола боруогун атыллыыр, ким эрэ курус үөрүү аргыстаах оскуоланы бүтэрэр сылын саҕалыыр.
Кинилэри кытта үөрэнээччилэрин чаҕылхай сулустарын умата, сарсыҥҥы кэскиллэрин сыдьаайа сырдата, оҕо саас аргыһын алтан чуораанын чугдаарда учуутал Билии күнүн арыйар. Кинилэр ортолоругар Дьокуускай куорат 26 №-дээх оскуолатын алын кылааһын учуутала, РФ норуотун үөрэҕириитин туйгуна, «Саха Азия оҕолоро» фонда стипендиата, СӨ педагогическай үлэтин бэтэрээнэ Зоя Семеновна Ксенофонтова аата дьоһун миэстэни ылар. Олорон кэлбит олоҕун 50 сылын оҕону иитиигэ-үөрэтиигэ анаабыт Сахабыт сирин ситиһиилээх сэмэй учууталын хаһыат нөҥүө бар дьоммор кэпсиэхпин баҕарабын.
Зоя Семеновна оҕо сааһа Кэбээйи оройуонун Мастаах нэһилиэгэр ааспыта. Оҕо эрдэҕиттэн учуутал буолар ыра санаалааҕа. Кэрэ айылҕалаах Кэбээйи сирэ-уота, көнө сүрүннээх туруу үлэһит төрөппүттэрэ, тулалыыр дьоно-сэргэтэ кыысчаан ыра санаатын бастакы олугун уурбуттара.
1964 сыл Дьокуускайдааҕы педучилищеҕа үөрэнэ киирбитэ. Өрөспүүбүлүкэ чулуу учууталларын үөрэхтэрин дириҥник өйүгэр-санаатыгар иҥэриммитэ. Үөрэҕин бүтэрэн 8 сыл Кэбээйи уонна Өлүөхүмэ улуустарыгар учууталынан үлэлээн дьиҥнээх олох оскуолатын ааспыта, учуутал быһыытынан буспута-хаппыта.
Учуутал аартыктаах айана салгыы киин куоракка салаллыбыта. Ол кэмтэн 33 сыл тухары харыс да халбарыйбакка Зоя Семеновна 26-с оскуолаҕа үлэлии-хамсыы сылдьар. Алта саастаах кырачааннары үөрэтэр экспериментатор-учуутал, саха кылаастарыгар сайыннарыылаах үөрэҕи киллэрсибит новатор-учуутал, сахалыы тылынан үөрэх кинигэлэрин, методическай босуобуйалары таһаарыыга быһаччы үлэлэспит методист-учуутал — бу барыта учуутал сыралаах үлэтин туоһулара. Ону тэҥэ, оскуола кэлэктиибин (дириэктэр Ноева Л.Н.) уһун сылларга муспут баай уопута.
Учуутал үлэтин саамай “үрдүкү суута” — кини үөрэнээччитэ. Онон ахтыыбын Зоя Семеновна үөрэппит оҕолорун ытык тылларынан түмүктүөхпүн баҕарабын.
«Күндү учууталбыт! Сааһыран истэхпит аайы ордук күндүтүк сылаанньыйа ахтабыт, оскуола боруогун атыллаабыт кыракый бэйэбитин, ол иккистээн эргийбэт оҕо сааспытын. Ол сырдык, ыраас оҕо сааспыт умнуллубат сорҕотунан учууталбыт эн, Зоя Семеновна, буолаҕын. Үгүс сыллар хонуктарын уҥуордаан биһиги бүгүн да бу баардыы өйдүүбүт, элбэҕи да үөрэнэн билбиппитин, көрдөөх оонньууларбытын, сынньалаҥмытын.
Эн аан бастаан биһигини үөрэххэ, улэҕэ кыһамньылаах, дьулуурдаах, олоххо актыыбынай, дьоҥҥо үтүө санаалаах, эйэҕэс доҕордуу буоларга, кэрэни-үтүөнү өйдүүргэ үөрэппитиҥ.
Учууталбыт барахсан истиҥ-мааны бэйэҥ, ылыннарыылаах тылыҥ-өһүҥ оҕо куппутугар, дууһабытыгар дириҥник да иҥэн хаалбыт. Ол иһин эйигин биһигинниин мэлдьи бииргэ сылдьар, таптыыр, элбэххэ үөрэтэр, үөрэнэр учууталбытынан, күндү киһибитинэн киэн тутта ааҕабыт. Эн олоххун, үлэҕин, дьоҥҥо истиҥ сыһыаҥҥын, эйэҕэс майгыгын холобур оҥостобут!”, — диэн үөрэнээччилэрэ махталларын суруйаллар.
Марфа КРОННИКОВА, педагогическай үлэ бэтэрээнэ
“Саха сирэ хаһыакка”, edersaas.ru саайтка анаан