Кулун тутар 22-23 күннэригэр Нам улууһун Хатырык нэһилиэгэр «ЫЧЧАТ ОЛОҤХОҺУТ» уопсастыбаннай түмсүү сылын ахсын ыытар сүрүн тэрээһинин — «Куйуур Олоҥхото —2019″ олоҥхону толорор ыччаттар күөн—күрэстэрин тэрийэн кэллибит.
Быйылгы тэрээһиммит Нам улууһун чулуу олоҥхоһута Василий Николаевич Попов — Бочоох төрөөбүтэ 110-сылын көрсө ыытылынна.
Ол курдук, бастакы күн, кулун тутар 22 күнүгэр тэрээһини үөрүүлээхтик аһыы буолбута. Василий Николаевич Попов аймахтара анал бириис туруорбуттара, бөлөҕүнэн уонна биирдиилээн толорууну түүн 12 чааска диэри истибиппит. Итиэннэ мин бэйэм олохтонон, хоноһолоон сытар ыалбар Алексей Михайлович Пинигин дьиэ кэргэнигэр уонна чугастааҕы ыалыгар анаан «Ыалга олоҥхолооһун» диэн туспа истии тэрийбитим.
Тэрээһиммит иккис күнүгэр, кулун тутар 23 күнүгэр сарсыарда эрдэттэн саҕалаан, дьүүллүүр сүбэ олоҥхону салгыы истэ хаалбыта, оттон олоҥхолоон бүппүт оҕолор бука бары куйуурдааһын сиэрин-туомун эбэҕэ киирэн көрбүппүт. Ити кэннэ олохтоох туристическай комплекска сылдьан, сибиэһэй салгыҥҥа оонньоон, сырсан, көччүйэ көппүппүт.
Эбиэппитигэр собо миинэ испиппит, балык сиэбиппит. Онтон хомунан түһүлгэбитигэр киирбиппит.
Быйылгы бэһис төгүлүн ыытыллар «Куйуур Олоҥхото -2019» тэрээһиммитигэр хаһааҥҥытааҕар да элбэх, уопсайа 46 ыччат кытынна. Ол иһигэр 4 бөлөҕүнэн толоруу уонна 21 биирдиилээн, олоҕурбут ньыманан толорууну иһиттибит.
Ыччаттар ускуустуба уонна култуура Арктикатааҕы судаарыстыбаннай институтуттан (АГИКИ), Культура кэллиэһитэн, Мэҥэ-Хаҥаластан, Намтан кэлэн кытыннылар. Кыайыылаахтары анал бириистэринэн, дипломнарынан наҕараадалаатыбыт.
Бырайыак ааптара Галина Семеновна Попова — Санаайа бэлиэтииринэн, ыччаттар лаппа тупсубуттар, ырыалара-тойуктара сайдыбыт, тыыннара уһаабыт.
Итини тэҥэ, түмсүүбүтүгэр эбии 18 ыччаты чилиэнинэн ыллыбыт. Онон, билиҥҥи туругунан уопсайа 102 чилиэннэннибит. Түмүктээн эттэххэ, бука бары интэриэстээх дьон, тустаах тэрилтэлэр «Ыччат Олоҥхоһут» түмсүү тула сомоҕолоһон, В.Н. Попов — Бочоох төрөөбүтэ 110 сылын көрсө «Куйуур Олоҥхото — 2019» тэрээһиммит үрдүк таһымнаахтык ааста.
Онон, бука бары күүс-көмө, сүбэ-ама буолбут биирдиилээн дьонтон саҕалаан, Ил Дархаҥҥа тиийэ барҕа баһаам махталбын тиэрдэбин! Инникитин даҕаны бииргэ үлэлэһэ туруохпут диэн эркин курдук эрэнэбин.
Юрий БОРИСОВ,
Өрөспүүбүлүкэтээҕи “Ыччат Олоҥхоһут”
уопсастыбаннай түмсүү салайааччыта.