Нерюнгри оройуонугар ситэриилээх былаас отчуота бүгүн, олунньу 11 күнүгэр куйаар ситимин нөҥүө СӨ доруобуйа харыстабылын миниистирэ Лена Афанасьева салалталаах буолла.
Отчуокка оройуон аҕа баһылыга Роман Щегольняк нэһилиэк баһылыктарыгар тыл биэрэн ыйытыылар олус чопчутук бэриллэн истилэр. Пандемия буолуоҕуттан бырабыыталыстыба отчуота ЗУМ ситимин нөҥүө ыытыллар. Манна туһааннаах министиэристибэлэр, тустаах оройуон нэһилиэктэрин дьаһалталара бары биир түннүккэ түмсэн интэриниэт ситимин нөҥүө тустаах кыһалҕаны ырытыһаллар, туруорсаллар, чопчу эппиэти, сыл түмүгүнэн отчуоту истэллэр.
Нерюнгри оройуонугар бэйдиэ ыт ахсаана эмиэ сүрүн кыһалҕа. Тоҕо эрэ бу ыттары иитиигэ, тутууга көрүллэр үп суумата икки төгүл кыччаабыт. Ыттарга аналлаах приюттар, пууннар тутуллууларын боппуруоһа долгутар.
Бэтэринээрийэ департаменын салайааччытын солбуйааччы Саргылаана Павлова:
—Биһиги эһиэхэ тустаах суругу ыытыахпыт. Муниципальнай приюттары тутууга кадастровай нүөмэрдээх сирдэр ананыахтаахтар. Бу үлэ икки түһүмэҕинэн ыытыллар. Маны таһынан, эһиги ыт уопсай ахсаанын киллэрэ иликкит. Эһиэхэ уопсайа 247 ыт тутуллубут, онон бу хайысхаҕа салгыы үлэлэһиэхпит, — диэтэ.
Чульмаҥҥа оскуола хаһан тутуллуой?
Чульмаҥҥа баар 9-с №-х оскуола эргэрэн сууллубута. Онон оҕолор 7-с №-х оскуолаҕа кыбыллан үөрэнэ олороллор. Хаһан оскуола тутуллуой?
СӨ Үөрэх уонна наука миниистирин бастакы солбуйааччы Михаил Присяжнай:
— Чахчы, оскуола хаарбах туруктааҕын туһунан билэбит. Эһиги оскуолаҕыт реестргэ 15-с турар. Онон (ПСД ) бырайыагын-симиэтэтин докумуонун оҥорон бэлэмнээтэххитинэ, хамсааһын барыаҕа. Бу үлэ оройуон дьаһалтатын соруга буолар, онон бырайыаккытын кытаатыҥ, — диэн эппиэттээтэ.
Ульяна ЗАХАРОВА.