“Чороон XXI үйэ” хампаанньа норуот маастардарын кытары анал уруоктары ыыттылар
Керамика, туой оҥоһуктарынан дьарыктанар “Чороон XXI үйэ” хампаанньа Саха сирин маастардарын кытары чороону уонна атын иһиттэри оҥорууга маастар-кылаастары ыыта сылдьар. Дьокуускай куораты таһынан Үөһээ Бүлүүгэ, Ленскэйгэ, Аммаҕа, Мэҥэ Хаҥаласка, Чурапчыга маастардар дьону кытары көрсөн, мас, туой оҥоһуктарга уруоктары ыыттылар.
Хампаанньа генеральнай дириэктэрэ Софья Попова иһитиннэрбитинэн, бу бырайыак норуот маастардарын, илиинэн оҥоһуктарын киэҥ эйгэҕэ таһаарыы, дьону-сэргэни төрүт үгэскэ чугаһатыы, сыһыарыы буолар. Бырайыак чэрчитинэн, Дьокуускай куоракка уонна өрөспүүбүлүкэ уон улууһугар 80-тан тахса маастар-кылаастар, куурустар ыытыллыахтаахтар. Билигин Дьокуускай куораты таһынан Үөһээ Бүлүүгэ, Ленскэйгэ, Аммаҕа, Мэҥэ Хаҥаласка, Чурапчыга маастардар икки тыһыынчаттан тахса киһини хабан, туой иһити оҥорууга, керамиканы оһуордааһыҥҥа, чороону кыһыыга анал уруоктары ыыттылар.
Бырайыакка норуот маастардара Таатта улууһуттан Афанасий Лопатин, Федор Чярин, Дьокуускайтан Ем.Ярославскай аатынан музей худуоһунньуга Василий Протопопов, худуоһунньук Виктор Лебедев, Сунтаартан “Чороон XXI үйэ” худуоһунньуга Лидия Николаева, Мэҥэ Хаҥаластан керамист Петр Егоров, эксперт-педагог Валентина Егорова кытта сылдьаллар.
Ону таһынан “Чороон XXI үйэ” салайааччыта Софья Попова, Арассыыйа худуоһунньуктарын чилиэнэ, ХИФУ доцена Ия Покатилова, Ем.Ярославскай аатынан Хотугу норуот историятын уонна култууратын холбоһуктаах судаарыстыбаннай музейын пуондатын салайааччыта Татьяна Старостина уонна музей археологияҕа, этнографияҕа отделын сэбиэдиссэйэ Василий Попов анал лекциялары ааҕыахтара.
Аграфена КУЗЬМИНА