«Чолбон» сурунаал «Тоҕус «Сэмсэтэ»

Бөлөххө киир:

Олунньу 9 күнүгэр Дьокуускайга Национальнай библиотека историческай саалатыгар «Чолбон» сурунаал «Тоҕус «Сэмсэ» диэн тэрээһинэ бэрт үрдүк таһымнаахтык ыытылынна.

Дьоро тэрээһин «Чолбон» сурунаал сүрүн эрэдээктэрэ Данил Макеев саалаҕа толору мустубут айар түмсүүлэри, ааптардары суруйааччылары, учуонайдары итиитик-истиҥник эҕэрдэлээһиниттэн саҕаланна. Кини «Сэмсэ» сыһыарыы саха эдэр ааптардарын айымньылара уус-уран өттүнэн сайдыытыгар төһүү буоларын ыйда. Дьон-сэргэ сөбүлүүрүн бэлиэтээтэ уонна «Чолбон» сурунаал эрэдээксийэтин саҥа кэллиэгийэтигэр киирбит дьоҥҥо анал дьастабырыанньаны дохсун ытыс тыаһын ортотугар туттарда.

Гуманитарнай чинчийии институтун литэрэтиирэҕэ сиэктэрин сэбиэдиссэйэ, филологическай наука кандидата Лидия Романова салайааччылаах эдэр учуонайдар «Сэмсэ» сыһыарыы тоҕус нүөмэригэр тахсыбыт ааптардар айымньыларын сиһилии ырытан биэрбиттэрин бары астыннылар. Филологическай наука доктора Анастасия Мыреева «Чолбон» сурунаал айар кэлэктиибигэр үчүгэй үлэлэрин иһин махтанна уонна атын сурунааллар кинилэр холобурдарын батыһан эрчимнээхтик үлэлииллэригэр ыҥырда.

Саха сирин Суруйааччыларын сойууһун бэрэссэдээтэлэ Наталья Харлампьева уонна «Сэмсэ» сыһыарыы ааптардара, араас улуустартан кэлбит ыҥырыылаах ыалдьыттар санааларын, эҕэрдэ тылларын эттилэр, ырыаларын ыллаатылар.

Былатыан Ойуунускай аатынан Судаарыстыбаннай бириэмийэ лауреата, «Чолбон» урукку сүрүн эрэдээктэрэ Николай Винокуров—Урсун тыл этэригэр:

— Биһиги кырдьаҕас уус-уран литературнай уонна уопсастыбаннай-политическай «Чолбон» сурунаалбыт «Сэмсэ» сыһыарыытын үөрэ-көтө бэлиэтиибит уонна инникитин да сайда туралларыгар баҕарабыт, — диэтэ.

Иван ОСИПОВ.

Ааптар түһэриилэрэ.

+1
0
+1
0
+1
0
+1
0
+1
0
+1
0
+1
0