“Чолбон” бассейн кулун тутартан саҕалаан спортивнай секцияларынан эрэ үлэлиэ үһү, уопсай нэһилиэнньэҕэ аана сабыллар” диэн сурах тарҕаммыта. Бу сураҕы чопчулаан Ил Дархан ааспыт нэдиэлэҕэ буолбут пресс-конференциятыгар “Эхэ столицы” хаһыат редактора Александр Прокопьев туоһуласпыта.
Егор Борисов бэҕэһээ “Чолбоҥҥо” сылдьан үлэни-хамнаһы билистэ, оҕолору кытары көрүстэ. Бассейн сарсыарда сэттэттэн киэһэ тоҕуска диэри үлэлиир. Манна спортивнай секцияҕа 650 оҕо босхо дьарыктанар. Ону таһынан күннэтэ 700 үөрэнээччи этин-хаанын эрчийэр. Онон күн аайы 1200-1300 оҕо дьарыктанар. Ону тэҥэ улахан дьоннор эмиэ көтүппэккэ сылдьаллар. Бассейн дириэктэрэ Аркадий Прокопьев бэлиэтииринэн, ааспыт нэдиэлэҕэ 4756 киһи сылдьыбыт. Итинтэн 1814 – улахан дьоннор.
Санатан эттэххэ, “Чолбон” 2012 с. “Азия оҕолоро” оонньууларын чэрчитинэн тутуллубута. Билигин үлэтин хайысхатын уларытан, кулун тутартан саҕалаан бассейн базатыгар харбааһыҥҥа анал оскуоланы үлэлэтэр былааннаах. Саха сирэ харбааһын көрүҥэр спортсменнары үөрэтэн-такайан таһаарыыга Россияҕа, ону ааһан аан дойдуга биир биллэр суолу-ииһи хаалларыахтаах. Онон сааскыттан саҕалаан харбааһыҥҥа анал үөрэхтэр саҕаланыахтара. Ол эрээри бу – бассейн үлэтигэр охсубат. “Бассейн нэһилиэнньэҕэ үлэлээбитин курдук үлэлиэҕэ”, — диэн иһитиннэрэр вице-премьер Михаил Гуляев.
Спорт миниистирэ Георгий Балакшин бэлиэтииринэн, 11 тренер спортивнай секцияларга, 5 тренер уонна 1 инструктор эти-хааны чэбдигирдэр бөлөхтөргө үлэлиэхтэрэ.
Егор Борисов былырыын саас элбэх оҕолоох ыалларга култуура уонна спорт эбийиэктэригэр чэпчэтиини көрүү туһунан анал ыйаах таһаарбыта. Ол чэрчитинэн, билигин “Чолбоҥҥо” биэстэн элбэх оҕолоох ыаллар сокуоннай саастары ситэ илик оҕолоро, доруобуйаларынан хааччахтаах дьон босхо сылдьаллар. Оттон үс-түөрт оҕолоох ыалларга уонна биэнсийэлээхтэргэ 50 бырыһыаннаах чэпчэтии көрүллэр.
Ыспыраапка: Бассейн билиэтин сыаната: Биир күҥҥэ сылдьарга оҕоҕо – 100, улахан киһиэхэ – 250 (киэһэтин уонна бырааһынньыктарга 350) солкуобай. Абонемент: улахан дьоҥҥо 1800 (нэдиэлэҕэ иккитэ сылдьарга), 2500 (нэдиэлэҕэ үстэ сылдьарга) солк. тэҥнэһэр. Оҕолорго ыйдааҕы төлөбүр 1300 солкуобай.
Аграфена КУЗЬМИНА, “Саха сирэ” хаһыат, edersaas.ru.
Мария ВАСИЛЬЕВА хаартыскаҕа түһэриитэ.