Чокуур Гаврильев: «Испитигэр иирээни күөттүү сатыахтара, биир сомоҕо буолуох»
Арассыыйа бэйэтин интэриэһин көмүскээн, ыаллыы дойдуга бүрүүкээбит быһыыны-майгыны төрдүттэн көннөрөргө, эйэлээх Донбасс дьонун быыһыырга, националистары уодьуганныырга туруммутун арҕааҥылар ылымматылар. Бэйэлэрэ урут куомуннаһан «киһи бырааба» дии-дии кый ыраах атын дойдуларга саба түспүт эбит буоллахтарына, билигин Арассыыйа «талабырдьыт» аатырда. Дьиҥэр, Украина былааһын кэтэҕиттэн уора-көстө өйөөбөтөхтөрө, сэрии сэбинэн хааччыйбатахтара, НАТОҕа ылабыт диэн эрэҥкэдиппэтэхтэрэ, Арассыыйа норуотун утары туруорбатахтара буоллар, итинниккэ тиийиэ суох этибит.
Биллэн туран, дьон-сэргэ байыаннай операцияны соһуйа истибит буолуохтаах. Ол эрэн дугдуруй да оҕус диэн мээнэҕэ эппэттэр. Бүгүн буолбатаҕына сарсын ити Украинаны кытта иирсиэ этибит. Тоҕо диэтэххэ, ыалларбыт национализм былааҕын өрө тутан сылдьаахтыыллар. Кыратык кыаҕыра түһэн баран, НАТОны кытта куомуннаһан, хаһан эрэ тоҕоостоох кэми булан, Донбасска киириэ, Крымы былдьаһыа этилэр.
Билигин, дьэ, дьиҥнээх Тымныы сэрии бүрүүкэтэ. Арҕааҥҥы дойдулар дьиҥ сирэйдэрэ көһүннэ. Санкция бөҕө биллэрдилэр. Бастатан туран, экономикабытын атахтаары үп-харчы ырыынагыттан араара сатыыллар. Урут иэс биэрбэт эҥин буоллахтарына, билигин араараары туруннулар. Бэл, олигархтарбыт харчытын, малларын-салларын былдьыахпыт диэн куттууллар. Ниэп-гаас кэнэҕэс хостооботуннар диэн оборудование биэрбэттэр. Ол эрэн гаас-ньиэп харчытын араарбаттар. Бэйэлэригэр охсуо дии. Ол курдук аны космоска бииргэ үлэлэһэрбитин тохтоппот үһүлэр. Иккиһинэн, транспортнай инфраструктурабытыгар сабыдыаллыы сатыыллар. Тоҕо гражданскай сөмөлүөттэри көтөллөрүн бопсоллор, лизины тохтото сатыыллар? Үсүһүнэн, дьон эрэйдэннин, арыый кыахтаахтара Европаҕа күүлэйдээбэккэ абаран салалтаны үөхтүн диэн дуо? Ыччат Дисней киинэлэрин көрбөккө аҕа саастаахтарга өһүрдүн диэн дуо? Төрдүһүнэн, идеологическай сэриигэ социальнай ситимнэрбит киһи өйүн сүүйэргэ анаммыттара дьэ биллэн таҕыста. Инстаграмм, Фейсбук, Ютуб — бу маны туттаргытыгар ону өйдөөрүҥ. Реклама диэн араас сымыйаны ыытан эрэллэр, судаарыстыбаннай СМИлэри аккауннарын араараллар. Бэйэ эрэ санаатын соҥнууллар. Отой өйдөөбөппүн уонна ылыммаппын университеттары утары санкциялары, спорду хааччахтааһыны… Наука уонна спорт дьиҥэр бэлиитикэттэн туора турар ээ.
Түмүккэ этиэм этэ, Арассыыйа курдук улахан дойдуну син биир кыайан муннукка хаайбаттар. Арҕааҥҥы аан сабылынна да буоллар, илин диэки аһаҕас. Билигин уруккулуу Арҕааҥҥы «атастарга» эрэл-итэҕэл хаалбата. Бэйэбит ис кыахпытыгар, ис күүспүтүгэр экономикаҕа да, духуобунаска эрэнэбит. Испитигэр иирээни күөттүө сатыахтара, биир сомоҕо буолуох. Санкциялар наукабытын, олохтоох оҥорон таһаарыыны, Айти секторын өссө күүһүрдүөхтэрэ. Бу сырыыга эмиэ саха сатаабатаҕа суох дииллэринии, Арассыыйа норуота сатаабатаҕа суох. Барыта орун оннун булуо, этэҥҥэ буолуо.
edersaas.ru