Чокурдаах аҕыйах сылынан биллэ тупсуо, киэркэйиэ диэн бигэргэтэллэр.
Тохсунньу 21-23 күннэригэр Аллайыаха улууһугар «Новая Земля» бырайыактыыр-консалтинговай хампаанньа управляющай партнера Иван Курячай уонна «Арктикаметрия» хамаанданы төрүттэспит Виктория Богинская, Чокурдаах бөһүөлэгин тупсарыыга былааны оҥорооччулар үлэлээтилэр. Бу туһунан улусмедиа «Путь развития» хаһыакка сигэнэн иһитиннэрэр.
Чокурдаахха Иван Курячай уонна Виктория Богинская бөһүөлэк уулуссаларын сыныйан үөрэппиттэр, иччитэхсийэн турар тутуулары көрбүттэр. Улуус баһылыгын Яков Елисеевы уонна дьаһалта отделларын салайааччыларын кытары сэһэргэспиттэр. Арассыыйа араас муннуктарыгар куораттары, бөһүөлэктэри бырайыактааһыҥҥа үөрүйэхтээхтэрин эппиттэр.
Кинилэр «Өлүөнэ очуостара» туристическай кластеры тэрийэн оҥорууга ыҥырыллыбыттара. 2020 сыл сайыныттан Саха сирин арктическай бөһүөлэктэрин, ол иһигэр Чокурдааҕы сайыннарыы пилотнай стратегиятыгар үлэлэрин саҕалаабыттара.
Иван Курячай: «Хоту сир атын сыһыаны, бырайыакка уратыны ирдиир, эрэйэр. Бөһүөлэги Индигир өттүттэн эмиэ көрдүбүт, хаартыска бөҕөҕө түһэрдибит. Олус кырасыабай көстүүлээх. Ыскылааттар, бөх-сыыс тоҕор полигон баар сиригэр, бырамыысыланнай зонаҕа сырыттыбыт. Бөҕү араарар, таҥастыыр туһунан боппуруоһу мүччү тутумуохха наада«, — диэтэ.
Чокурдаах уларыйыыта, бастатан туран, сүрүн — Ленин уулуссатыттан саҕаланыа. Кулууп утары хаалбыт сир («Инди» ЭКК) уонна бөһүөлэккэ киириигэ былаһаакка — аэровокзал бааллар. Бу икки сир хайаатар да тупсарыллыахтаахтар.
«Манна кэлиэхпит иннинэ СӨ Арктиканы сайыннарыы уонна хотугу норуоттар дьыалаларын министиэристибэтигэр сылдьан тупсаран, саҥардан оҥоруу бырайыагын дьүүллэспиппит. Үлэни саҕалааһын туһунан улуус дьаһалтатыгар кэпсэппиппит. Саамай кылаабынайа — куорат тутуутун уонна бөһүөлэги сайыннарыыны ситимнээһин былаанын табыахпытын, сөптөөхтүк толкуйдаан, биир стратегическай бырагыраама оҥоруохпутун наада. Үлэ салҕанар«, — диир Виктория Богинская.
Бастакы түһүмэххэ (быһа холуйан 2021-2025 сыллар) Чокурдаахха «2019-2025 сылларга хаарбах дьиэттэн гражданнары көһөрүү» бырагырааманан үлэ ыытыллыа. Чокурдаахха уу ыстаансыйатын, канализационнай-ыраастыыр тутуу кыһалҕаларын былааны оҥорооччулар билэллэр. Чокурдаах тэриллибитэ 85 сылыгар анаммыт тупсарыы үлэтэ хас да сыл салҕаныа. Ол түмүгэр, оройуон киинэ биллэ уларыйыа, аныгы үйэ бөһүөлэгэ буолуоҕа.
+1
+1
+1
+1
+1
+1
+1