Бу дьыл кулун тутар 25 күнүгэр, киэһэ 16.00 чаас саҕана, Дьокуускай куорат ГИБДД-тын дьуһуурунай чааһыгар иһитиннэрии киирбит. Чочур Мыраан хайатын анныгар суол быһылаана тахсыбытын туһунан.
Барыллаан быһаарыынан, 61 саастаах суоппар Бүлүүлүүр суол 6-с км баар Чочур Мыраан хайатын аннынан «Тойота Кроун» массыынанан айаннаан истэҕинэ, массыынатын кэлиэн диэки өттүгэр 10-лаах уол оҕо саайыллыбыт. Бу оҕо сыыртан «ледянканан» түспүт. Ол түмүгэр, уолчаан түөһүгэр эчэйии ылан, кинэхэ амбулаторнай эмтээһин анаммыт.
Оҕо ийэтэ быһаарбытынан, кинилэр дьиэ кэргэнинэн Чочур Мыраантан кирилиэһинэн түһэн испиттэр, онуоха уоллара «ледянканан» сыыртан сырылаан түһэн, ааһан иһэр массыына кэлиҥҥи көлүөһэтигэр тиийэн саайыллыбыт.
Оттон суоппар быһаарбытынан, кини Чочур Мыраантан Бүлүүлүүр суол диэки, чааска 7-10 км түргэннээхтик айаннаан испит. Ол кэмҥэ массыынатын хаҥас өттүгэр туох эрэ охсуллубут. Тохтоон, эргиллэн көрбүтэ — хаарга илиитигэр «ледянкалаах» уол сытар эбит.
Нарколог-быраас туоһутунан, суоппар арыгы испэтэх, өйдөөх эбит.
Бу чахчынан Дьокуускай куорат Госавтоинспекцията административнай силиэстийэ ыытар. Бу туһунан СӨ ИДьМ-тын пресс-сулууспата иһитиннэрдэ.
Төрөппүттэр! Оҕолоргутугар ханна, хайдах сылдьыллыахтааҕын үчүгэйдик быһаарыҥ, сүбэлээҥ, болҕомтолоох буолуҥ!
Биһиги корр., «Саха сирэ» хаһыат, edersaas.ru
Хаартыска: интэриниэттэн.