Чочулар биир дойдулаахтара Роман Дмитриевынан киэн тутталлар

Ааптар: 
Бөлөххө киир:

Бүгүн 1972 сыллаахха Мюнхеҥҥа ыытыллыбыт Олимпиада кыһыл көмүс мэтээллээх чөмпүйүөнэ Роман Дмитриев төрөөбүт күнэ.

Аатырбыт спортсмен туһунан Бүлүү улууһун Чочу нэһилиэгин баһылыга Петр Догоюсов бэйэтин инстаграмыгар бу курдук кэпсиир:

— Күүстээхтэр -кыахтаахтар тустарынан кэпсэтии буолла да сахаттан бастакы чемпион Роман Дмитриев биһиги алаастарбытыттан, сирбититтэн-уоппутуттан төрүттээҕинэн киэн тутта кэпсиибит.

Роман Михайлович Баһах Макаар  аҕатын ууһун киһитэ Хоруодьа Түмэппий сиэнэ буолар. Дьиктитэ баар уолаттара биэс аҥыы араспаанньалаахтар. Уолаттар бары да, ыраах айаҥҥа сылдьар, чулуу үлэһит күүстээх уохтаах эбиттэр. Борокуоппай элбэх ыччаттаммыт. Улахан уол Арамааны, тустубатар да,  дьоно-сэргэтэ күүстээҕинэн ааҕаллара. Арамаан холкуоска киирбэтэҕэ, таба ииттинэрэ.Кинини Атыыһыт Арамаан, Табаһыт Арамаан уонна бытархай хаһаайыстыбанан олорорун иһин Бытархай Арамаан дииллэрэ.

Бүлүүгэ кэлэр-барар күүһүмсүйэр дьону тустан тулуппат эбит. Арамааммытын  билэр дьоно бары  умнуганынан билинэллэр эбит. Ол да иһин буолуо, биир дойдулаахпыт, бэйиэт Иван Гоголев  «Арамаан-тарамаан» диэн хоһоон айан турар.

Биһиги биир дойдулаахпыт, Кыадаҥдаттан төрүттээх  Роман Дмитриев 60 сааһыгар  олохтон туораабыта. Кини норуотун киэн туттуута, хомпоруун хотойо буолар.

Сэбиэскэй сойуус алта төгүллээх чөмпүйүөнэ, Европа, аан дойду олимпийскай оонньуулар  чөмпүйүөннэрэ Роман Михайлович Дмитриев  биһиги Чочубутуттан төрүттээҕинэн киэн туттабыт. Кини олорон ааспыт олоҕо, кыайыыга дьулуура биһиэхэ үтүө холобурунан буолар.

… Быйыл Чочу нэһилиэгэ 250 сыллаах үбүлүөйүн бэлиэтиир. Онон сибээстээн нэһилиэккэ Ийэ дойдуга бэриниилээх буолуу сыла биллэриллибитэ. Чочулар бу бэлиэ сылга аатырбыт биир дойдулаахтарын туһунан астына-үөрэ, киэн тутта кэпсииллэр.

Елена ПОТОЦКАЯ, “Саха сирэ” хаһыат, edersaas.ru

Хаартыска — Петр Догоюсов инстаграмыттан.

+1
0
+1
0
+1
0
+1
0
+1
0
+1
0
+1
0