Быйыл Бүлүү улууһун I Чочу нэһилиэгэ төрүттэммитэ 250 сыллаах өрөгөйдөөх үбүлүөйүн бэлиэтиир. Онон сибээстээн чочулар Ийэ дойдуга бэриниилээх буолуу сылын биллэрбиттэрэ.
Бу сыл устата нэһилиэккэ араас бэлиэ тэрээһиннэр, ураты ис хоһоонноох үлэ ыытыллар. Нэһилиэк баһылыга Петр Догоюсов бу күннэргэ Аан дойду дьахталларын күнүн көрсө нэһилиэк дьахталларыгар анаан хаартыскаҕа түһэр зонаны оҥорбуттарын маннык кэпсиир:
— Саҥа дьыл аптаах бырааһынньыгар анаан ыччаттарбыт муус кириэһилэ оҥорон туруорбуттара. Бэлиэ бырааһынньыктарга анаан хаар ууллуор диэри бу бэлиэ сирбитигэр нэһилиэк үбүлүөйүнэн сибээстээн, хаартыскаҕа түһүү зонатын оҥорор туһунан кулууп үлэһиттэригэр этии киллэрбитим. Ол ону ылынан сааскы сырдык бырааһынньыгар дьахталларбытыгар ураты бэлэх оҥордубут. Бизон пааматынньыга — мэҥэ бэлиэбит. Емельян Ярославскай аатынан мусуойга бу оҕус маҥнайгы эспэнээт этэ. Ол бэлиэтигэр бу пааматынньык турар.
Кырдьык, үбүлүөйү бэлиэтээһин аҥардас үөрүүлээх мунньах, кэнсиэр буолбатах. Маннык ураты көстүү нэһилиэк үбүлүөйүгэр ананара — ураты сонун сүүрээн.
Елена ПОТОЦКАЯ, Саха сирэ хаһыат, edersaas.ru
Хаартыска — Чочу нэһилиэгин инстаграмыттан.